[Puisi Bahasa Gayo] Seni Ni Pacu Kude
Punce Simehate S
ara cerite ike musém pacu kude
engkip ni belang delé ni heme
barang monja bolang baling siep sedie
morom mugelung umet ni manusie
iwan pacu kude murum bergegure
kedik tauk surak muorum riah bererie
kude luah kite si gabuk bergunah até
jantung debak debuk mera kécos cerak pé
delé demu sudere iwani pacu kude
Takéngen Bener mujadi sara ine
ari Gayo Lues pé mutamah serinen te
demu demu i belang pacu kude
sebelum kude luah gere ara mu cerite
nge sawah finis baro demu seni é
pemilik kude urum-urum bahagie
si kena silaturahmi i aran pacu kude
kude simenang géh mango ku jep umah
mangan murum ku batang ruang
sire nampi tasak kaming jantar kuah
berberakah kedik pé runcang
resam pacu kude i lelah ni belang
demu sudere bier pé gere sara urang
ari toa debat ari uken baor paloh morom sara ruang
ike nge i lelah ni belang tetap kite sara ide [SY]
Takéngen, 2022
*Punce Simehate S, adalah mahasiswa semester akhir Sekolah Tinggi Ilmu Hukum Muhammadiyah (STIHMAT) Takengon, pemilik dan pecinta kuda pacu Gayo sejak usia balita. Ia juga adalah cucu dari H. Sulaiman Aman Hafisah-Meriah (Alm) yang melegenda “Pesaka 12”.
