[Puisi Bahasa Gayo] Lime Asu Tue i Tugu Kute Takéngen. 1
Salman Yoga S
Ara lime asu tue
I Tugu Simpang Lime Kute Takéngen
Ara siberjangut item, ilang senye mupenguning
Putih sangut den belang köring
Derong peberguk lagu munantin misi palung
Mataé lebuh munéngon kendaraen
Si nge sar-sur ku ujung ku ralik
Mejen lagu mukarat bededik bidik
Sentan lampu jelen ijo mubalik
Sigati mulintes i jelen ini
Nge pasti penah munérah
Bierpé mukekarat serapah
Nge turah mukelibeten
Terlebih mien si penah singah
Ku BPD atawe toko Asia Jaya
Ku arah élopen bagin barat kota
Bik berbelenye ralan-ralan cuci mata
Paké oya pasti ara iyoné pedora
Enta terkecuali déba gere ideri jema
Jeb tempat i jeb kota
Paké ini tetap ara
Barik i Medan Banda
Atawe i Ibu Kota Jakarta
Takéngen, 2014-2021
* Dipetik dari Buku Antologi Puisi Bahasa Gayo “Likes” Bab “Takéngen”, hal, 8-15. Takengon: The Gayo Institute (TGI), 2021.
