[Puisi Gayo] Murintis
Z. Gerpa
Aku murintis atan uten rime
Kelam porak lao hék gere tetimang
Sesire murintis jarak orom sudere
Seseger musarik manuk tetangang
Ulak kumah urum lapéni tuke
Sempat ke die aku mujerang
Sesire mujerang dabuhen munite
Rokok ulung gere sempat ilang
Besilo murintis nge méh munge
Mungalih mien buet munebang
Kuabah kayu kucaké
Buh penimpe é kayu medang
Besilo munebang nge méh munge
Mungalih buet malé munyincang
Cabang kupurun nge mutetimpe
Bierpé rui kao kucincang
Besilo munyincang nge méh munge
Mungalih mien buet memancang
Ku ayo ines pemancangé
Kuéngon barisé benyer murentang
Inih kupi nge mokot kusemé
Nge dabuh timul cabang
Selohmi die kukuruk gedungngé
Kati kupinah sesara batang
Singket cerite kupi kusuen
Besilo buet nge ara murengang
Nge ara dekat kasé sudere
Delé nge heme siberkasih sayang
Takéngen, November 2021
*Z. Gerpa adalah nama pena dari no name, pemerhati adat Gayo tinggal di Bener Meriah.
[SY]
