Lagu Si Gere Neh

oleh

Tengkeh Seloka Gayo

Oleh: Dr. Joni, MN, M.Pd, BI

Ujut baru mera we mubah, nahma pe mera we mupinah si kerna ejet orum niet si dor mubah. Pudahna i perin ari datunte enti i bueten leming silu edang sile anak-anaku.

Ike berakah i joyah sene ni biasa we i telege, sediken betape ara amat-amaten te si amanah ne ku kite uwah ni rimbiye beramuren, resam ni dunie peraturen. Enti lagu si gere neh, edetni i amat gelah kuet, enti sawah pipet, kusonen miyen ukum pe enti sawah ble.

Enti lagu si gere neh, heme ni turah berpikir, i tempuhi miyen akal gelah kin pangkal boh kati gelah nguk ken belenye. Ini kite si beredet berharap ku suderente bewene ku tuah bahgiente, gelah si pantas kedang kase lepas renye berule. Kul pedeh tuah raya pedi nge bahgiente, kin kelik kalang orum cico ni cincimpala buge jarak ari kite kati beluh bele gip seteru ari kite orum kite.

Simehate siturah ara wan ujut barunte, jaraki sok-sangka rum tuke lengkong. Jegei meruah rum nahma enti sawah rusak agama, boh gelah mutimah lemut rum beturut payu. Wo serinen suderengku edet mu-tetingket ukum mutetenge, enti lagu si gere neh. Ike nge lepas keta buet ta, haram keta besamak, mekruh bebasuh, si kerna esot si bernahma, rugi si mureta.

Enti lagu si gere neh, karit kediye boh gelah belapang, gelep ke keta boh besuluh, enti sawah gere gatal pe turah i kayo. Serinen rum suderente ma’af rum maas, tabi sudere bejamutmi bang jurah, berterimemi kire berserah. Kene tenah ni ama inente enti lagu si gere neh, ke ku langit pe enti sawah kujerat ilang, ke ku bumi enti sawah ku atu ampar, gelah beramat-amatenmi kite ike ku uken keta gelah mutelege pitu i toa pe mu pitu kuala, segermi gelah mutape ikot enti tunung bijak ni peri rum carong ni awah.

Enti lagu si gere neh, ike seneta nge pasti roa jengkal, sedepa pe nge pasti opat seta, senare pe nge jelas senare pe nge jelas opat kal. Agih… agih.. Genapsi nge munge genap si belem.

*penulis adalah Wakil Ketua Majelis Adat Gayo

Comments

comments