Oleh : Iwan Kenangan*
Ilmu den filsafat ni uluh male ku kupes cube mulo i simak, kadang enguk i amalen morip wan ni donya. Tikik-tikik ku susun kekata mumanang uluh si kul ni perdu urum rues si naru. Rupe rupe e dele pelejeren si perlu kite renungen koan ate dirinte.
Iwan ni Al-Qur’an surah An-Nahl ayat sebelas Allah berperi: “ari wih ni uren na kami munorepen kin kam senuen zaitun, kurma, anggur den segele bentuk uah-uahen. Betul, si lagu noya betul-betul ara tene kukuasaan Allah ken jema si berpikir”.
Bewenne si i jadin ni Tuhen makhluk si morip i langit atau i bumi, si ara wan lauten atau i atas ni tanoh, bewenne ara keperluenne den ara tersiret pelejeren si enguk kite conto. Manusie si mu kelebihen i osah Tuhen akal urum kekire, lagi semperne anggota tubuh, buge lepas munuet kesimpulen.
Pora kami bayangen ilmu ni uluh, ari uyet sampe ku pucuk bewenne enguk i gunei kite manusie wan ni moripte. Uluh dele berbage bentuk urum rupee, bage-bage mien geral urum curak corekke, ara si kucak, ara si sedang, ara mienne si gemok gopok den lesuh mujangkonen langit.
Ari uyet mi kao uluh nge bergune, uyetmu munamat tanoh si king penadi buge tanoh ni gere i anut ni weh, gere minah sediken gaeh uren keras. Uyetmu si dele mucabang teba sampe tangkuh ari wan tanoh, oya i bobon katak orom iyok kin umahhe.
Morip bang kase tongkolmu, i rasi jema kao tuwis, ike irebus urum santan lemak mera gere beringet enge mutulun tamah pembubuh. Imacamjing urum depik kering atawe depik basah mera gere tebuh turun ku ume, pengat kering urum gule jaher gere ilen icube nge mener elihte. Cumen inget-inget enti salah munuet tuwis, dele pedi kosim, mera seget sara beden.
Enge kul anakmu mutamah ruesmu timul mien batang mera renye naru sampe mutilok ku langit, tape pucukmu tetap wa mumanang ku bumi. Batangmu ike sediken sawah umur urum bulusmu engok igunei jema kin tersik den kin belide. Keti enti bang kase geh koro kude lemu mumerjaki senuen, keta ipeger ipasang ruk bang gelah ringkel, alatte si mehat ari tubuhmu.
Gere oya we kase, ike kona ku jema si bijak, irecak batang ruwesmu i pelaku munos rungang urum penjere tama, tamahen mien ken penjere ni kurik, i tos kin niyu, sawah i tos jema kin tulen ni lelayang, teba kulit kulitmu i bobonne kin penikot, dele pedi kegune enmu ike male ku titiren.
Ara sara bentuk rupemu i rasi jema uluh ines, ruesmu si naru kulitmu si tipis, oya gunemu kin soling, buge engok bang kase kite berseni wan batang ruang atau i pematang. Kona soling ines mera lale kite mumenge we, mutamah lungun ike berseni.
Tape inget-inget gere bewenne jema pane muniyup luang ni suling, ike gere lebes mera sampe kering anak kalah. Ike kona ku jema si bijak lagi pane, didong, syair, pepongoten atau sebuku wan berseni, segele kesenien engok i deman urum suling.
Sarami i rasi jema ko uluh serik, i bobon jema kao kin ekik, si mulentik pucuk, ikot bang benang ku atas tubuhmu tamah besi kin mata ni tali i balut mien urum ketol kin pakan ni gule buge dapur si lebuh masap sara sagi.
Uluh utung bang i rasi pake, rupen kerna ruesmu si konot, bedenmu si gopok, bulet den tehen terhedep gicip getuk. Ibobon kekanak ni kao kin meriem, kin pelale ni ate wan pasa, dang-dang bebuke kao i guel. Laing mu si luting sampe muguncang sara donya, inget-inget pora win ipak, enti bebarang guel arap ni tetue si mera pugegerle, udah selop jepang sawah ku atasmu.
Tikit niko salahmu wo uluh utung, i arang gere terarang i kemek gere terkemek ike sesara jema, turah mu bilangen mulo jema baru lepas kao i esot. Beretmu urum rues mu si konot, tebel ni usimu si gere terbelok, patut keti parang betul gati muperlok.
Ara mien uluh regen, batangmu si bulus mersik bulus-bulus, kulitmu murah i kikis, usimu si tipis i tos jema kin tepas atau i rasuk kin keranyang atau kin niyu. Dele bermacam bage i pergunen kao uluh gere bangnge kin kekuah ni ko muripmu. Bersemet…[SY]
*Pemerhati adat sosial dan budaya Gayo, aparatur Pemerintahan Kabupaten Aceh Tengah tinggal di Kecamatan Lut Tawar.
