Oleh : Salman Yoga S
[Saer Gayo] Inget Tekona Corona
Gelahmi inget-inget kite kin tekona
Jemen besiloni aradi kumen siberbahaya
Kene berite i media asale ari Wuhan
Gerale murahdi iucepen wan awah
Berbentuk pandemi virus singe megah
Wabah ini jeb denie den negara irasi Corona
Kin cacak ni geralle gere dis urum dahlia
Si galakki beberu bunge simampat i mata
Batangnge naru lagu murerues lebih seneta
Sigere pehem gere teridah ara ruie sara roa
Penyakit ini mubeda pora ari Pakanlaya
Sipenah munyerang masyarakat Gayo pudaha
Mera renye mupinah nebah ku len jema
Ari wih ni ilih salah jemak mera renye tekona
Atawe kerna bersin gere seje musempur ku mata
Langkah ini entimi behu bier mudoa kebel
Sebeb ike tekona kase gere tuho geropul
Bier asap ni kemenyen itunu mujejebul
Tamah mien belah wih ni asam mungkur
Pake oya mukulubana gere pangan selensung
Entimi mulo kite pacah oloktu pujejamah
Kadang nentong biak sudere ku len umah
Bertanang jaunang dediang ku luer daerah
Minsel murum mukekamul rami wan sara acara
Sebeb virus ini deba gere mutene gere mugejala
Tibe-tibe renye lekat betempat ku tubuh anggota
Kadang turahdiwe si kerna pentingnge
Keta isiepen alat penutup ni iyung urum awah
Lagu besongom kedah asal deba teridah
Gere mukunah kati enti kite kin uluni wabah
Ngukken mewen padih mulo kite i umah
Sana siperlu ara waktu arih-arih ipetetah
Kadang gerediwe turah ngenal napekah
Sebeb deba jema teduh pangan teduh perah
Terlebih kebere pemerintah ara male munosah
Keta pakat langkah ku empus kite mandah
Wo bayak baju biak suderengku
Wabah ini lagu kuyu gere teridah
Lagu rara porak gere tejemak
Kenge kona penyakit gere muak
Keta gelahmi bijak kite beriren-irenen
Vilar Wih Ilang – Asir Asir Atas, 2020
