TAKENGON-LintasGAYO.co : Nuansa bahasa Gayo sangat kental terasa dalam sidang paripurna HUT ke-443 Kota Takengon, Senin 17 Februari 2020 di ruang sidang DPRK Aceh Tengah. Betapa tidak, semua proses acara dalam pelaksanaan sidang menggunakan bahasa Gayo, terkecuali pada saat menyanyikan lagu kebangsaan Indonesia Raya.
Pantauan LintasGAYO.co, Ketua DPRK Aceh Tengah, Arwin Mega yang terlebih menyampaikan sambutannya membuka sidang paripurna. Dalam pidatonya, Arwin Mega menggunakan bahasa Gayo. Dilanjutkan dengan pidato Bupati Aceh Tengah, Shabela Abubakar yang tak ketinggalan menggunakan bahasa Gayo.
Berikut Pidato Shabela Abubakar berbahasa Gayo :
ASSALAMUALAIKUM WR WB,
AMA REJE, TABI TEMULO LANGIT,
ULEN URUM BINTANG,
KEN SULUH TERANG MATA NILAO,
KUYU BEREMUS UREN PE SIDANG,
GELEP URUM TERANG KUASA NI TUHEN TE.
KU SIDRATUL MUNTAHA NABI MURAI SEMIANG,
OYA NGE TERANG PERINTAH KUKITE,
ENTI NE RAGU URUM GELISAH
SURAT AL-FATIHAH KITE BACA MULO
MAAF MULO BUMI BUR URUM PEMATANG,
LAUT SI GELUMANG URUM UTEN SI IJO
TELEGE SI JERNIH ATAN PEMATANG
OYA NGE TERANG DEKAT SEWIR LINGE
PEMULO I PANTIK UMAH PITU RUANG
TURANG MURESE BARU ARA BERE
IKE RUKUN LIME ENTI NE KITE RENGANG
PERTAMA SEMIANG SI WAJIB KU KITE
SIKAMI PEMELIYE KURU RAYAT DPRK KAB. ACEH TENGAH
SIKAMI PEMELIYE SUDERE-SUDERE UNSUR FORKOMPIMDA ACEH TENGAH
SIKAMI PEMELIYE SUDERE SEKDA, STAF AHLI, ASISTEN, KEPALA SKPK RUM PARA CAMAT SERTA KEPALA BAGIEN SETDAKAB ACEH TENGAH
SIKAMI PEMELIYE SUDERE SEKWAN RUM IRINGEN NARU
SIKAMI PEMELIYE SUDERE PIMPINEN BUMN/BUMD
SIKAMI PEMELIYE I PIMPINEN ORGANISASI WANITA
SIKAMI PEMELIYE SUDERE TOKOH MASYARAKAT, TOKOH AGAMA, ADAT RUM KAUM INE URUM TUAH BAHGIYE SENGE KUNUL REMPAK IBATANG RUANG NI
PUJI URUM SUKURTE KU TUHEN ALLAH SWT, SI MU KASIH GERE LANIH, SI MU SAYANG GERE LELANG KUKITE, SI MUNOSAH NIKMAT SEHAT URUM SEMPAT, SEHINGE BEWENTE NGUK MUKAMUL, ARA WAN RASA SUKE BAHGIE, WAN MAJELIS SIMULIE RAPAT PARIPURNA ISTIMEWA DPRK ACEH TENGAH, WAN ACARA MUNGENANG HAT HINGE LO JADI NI KUTE TAKINGEN I TUN 2020 NI.
SELANJUTE SELAWAT URUM SALAM KU JUNJUNGENTE NABI MUHAMMAD SAW, SI ENGE BEJUANG ARI SI GELEP NGE I PINAH NE KITE KU SI TERANG, ARI TON SI KARIT NGE IYESOTNE KITE KU SI LAPANG, ARI ARUL SI RENAH NGE I TATANG NE KITE KU PEMATANG, BUGE MAYO WAN GOLONGEN SIMUNERIME SYAFA’ATE I YAUMIL AKHIR, AMIN YA RABBAL ALLAMIN
SUDERE-SUDERE TUAH BAHGIE SI ENGE MURUM MUKAMUL I ATAN BATANG RUANG NI
ATAS NAMA REJE ULU RINTAH SI MU IRINGEN NARU, KAMI MUNYAWAHNI KATA BERIJIN URUM KURRR SEMANGAT TERTUJU KU TUEN RINTAH RAKYAT GENAP MUPAKAT DPRK ACEH TENGAH URUM IRINGEN NARUE SI NGE MUJADI SUKUT SINTE MAJELIS SI MULIE SIDANG PARIPURNA ISTIMEWA MUNGENANG HAT HINGE LO JADI KUTE TAKINGEN SI 443 TUN TER LO SI SERLONI,
PEMULO I TUN 2011 KITE KENANG LO JADI KUTE TAKINGEN, NGE MUSEPULUHEN URUM TUN INI, UJUD ARI MAKNA PENTING NI KELAHIRNI KUTE TAKINGEN, KUTE NI SEULIYE, SI IKENANG BEWENE ISI NI SARAK.
BET SEBETAPE, PATUT KIRE E KAMI MANATEN WAN LO JADI NI KUTE TAKINGEN NI, BOH NGUK MUJADI KESAH ALUS TUDUNG SUTERA KU KITE WAN MUMAKNAI SEJARAH NI KUTENTE, MUEDET, RESAM KIN PEGER, URUM BERADAB
HAT HINGE BEGANTI, UMUR PE MUTAMAH KIRE NGOH NOYA SEMANGAT MUNULUN BUET SI ITETAH URUM BAKTINTE, BUGE SAWAH BANG ANGAN KASAD, PINTE NI ATENTE MURUM-MURUM BOH MAKMUR SEJAHTERA ISI NI NENGGERI ARI NI KU ARAP
SIDANG MAJELIS SIMULIE RUM TUAH BAHGIE
EMPAT RATUS EMPAT PULUH TIGE TUN UMUR NI KUTENTE, KIRE E MUJADI BEBAYANG NI RUPE, KISAH SEJARAH SI ENGE MUREGANG, RUM CORAK RAGAM UNTUNG NASIP NI RAKYAT ISI NI NENGGERI. BET SEBETA PE, KUKITE GENERASI SI TENGAH KIN PANGKAL, SUKUT SI WAJIB, TETAH PERLU, TENTU NI UNTUNG NASIP NI GENERASI KUARAP SO.
MURUM-MURUM KITE BETIH BURUK MACIK, UNTUNG TUAH GENERASI KUARAP O OYALE UAH JARINTE, GENERASI SI SENI SELAKU PANGKAL SUKUT, ARI KERNA HAL OYA, PERLU KITE UET:
PEMULO, JADIN CERMIN KACA SENIRING MUNGENANG LO JADI KUTE TAKINGEN, KITE UKE BANG RILAH CATATAN SILIWET SELAKU RIWEYET MURIP NI NENGGERI, KATI BERTIRU BANG KU REMBEGE, BERCONTO KU SINGE MUNGE, ARA BANG KASE TUAH BERPAPAH, BAHGIE BERTONA, WAJIB TETAH PERLU TENTU KU SEGELE BIDANG RUM ARAH, ALIHHE BANG MUJADI LANGKAH KUARAP LANG O KASE
KE ROA, URUM MUNGENANG LO JADI NI KUTE TAKINGEN NI, BUGE MUJADI RENUNGEN URUM DAH KUKITE MUNETAH TENTU RUM MUJEWEB PERSOALEN SI GEH BERTUBI-TUBI URUM REMPAM RANYO JELENTE KUARAP O
KE TULU, URUM MUNGENANG LO JADI KUTE TAKINGEN NI, GELAH SEPAPAH ,SEPUPU, SEBEGI, SEPERANGE MI KITE MURENTANG UNANG, KUNE KERAWANG NENGGERI KUARAP NI, TAPE GERE KITE LUPEN NILAI URUM NORMA DASAR, PETUNJUK URUM PERINSIP, OYALE DASAR PANCASILA, PETUNJUK AGAMA ISLAM URUM PRINSIP EDET BUDAYA GAYO
SIDANG MAJELIS SIMULIE RUM TUAH BAHGIE
SELAKU ISI NI SARAK NENGGERI KABUPATEN ACEH TENGAH, TURAH BERSYUKUR MUJADIN LO JADI KUTE TAKINGEN NI, SI MUJADI KEKIRE URUM RIKE, ENTI SAMPE KITE LUPE KIN ALIH NI PUMU, URUM LANGKAH NI KIDING SI BUET NI MUYANG DATUNTE
URUM BUET SINGE NGE NI, BOH KUARAPNI MURUM KITE PETETAH, KERAMAT TE KIN MUPAKAT, BEHUNTE BERDEDELE, AKAL TE KIN PANGKAL, KEKIRE KIN BELENYE. BET BETA PE, KU KITE, SI KUARAPNI GELAH MUNINGET KIN MANAT PETENAH ARI MUYANG DATUN TE, SI OSOP BEPERAH, TARING BERAYI, KETA SI ARANI GELAH KITE PEJAMURI
SIDANG MAJELIS SIMULIE RUM TUAH BAHGIE
AROK TE ENTI MUPOLOK, GALAK TE ENTI MUSELPAK, BUGE TEMBEGE PE NGUK MUJADI PIRAK. BUET TURAH BENYAWA, SI BIJAK KIN PERAWAH, SI KUET KIN PENEMAH, SI PANE KIN PENETAH, AMAT MUTUBUH, PANGAN MURASA, ENGON SAREH PANANG NYATA
RASA SI IPERASA, ISAMUT KU PEMIKIREN, SEHINGE TERWUJUD WANI I’TIKED ADIL,KASIH BENAR DAN SUCI, BERBUNGE MUMOTIK KIN UAH NI KETIER TE. SI KERNA OYA PEMERINTAH ACEH TENGAH MUNGUSUNG TEMA “URUM MUNGENANG HAT HINGE SI 443 TUN KUTE TAKINGEN MURUM KITE SEMAWAH, PUMUN TE MUSARA NALIK KIDING TE MUSARA LANGKAH KU MASYARAKAT ISLAMI” SI KITE JADIN RATIP MUSARA NANGUK KALA NI TERTIB BERMAJELIS, SEGERMI KITE BERSERAH DIRI KITE KU TUHEN, BUGE I RIDHO I EKIN DAH TE MURENTANG UNANG KUTE TAKINGEN KU ARAP O PUREN MAMPAT BELANGI
SIDANG MAJELIS SIMULIE RUM TUAH BAHGIE
IDUNG BERTETUNUNG TALI PUTER TIGE, TAMAH TALI MESTIKE, KAMI ULU RINTAH KUTE TAKINGEN, PANTASE KADANG KASE LEPAS, LEMEM PE KADANG TARING, HARAP KIRE E GERE SENGKERAT, TUAKAL GERE SEMELAH KU BEWENE IRINGEN NARU, TAMUN KAUL NI SARAK NENGGERI I BERET UMAH PITU RUANG, TEGUH TEGAK SI KERNA PENULANG ATAS RUM TUYUH SI PITU PERKARA, MAKNA E, MULIE NI RUJE IBUBUN KIN PAYUNG, MULIE NI TUDUNG KIN SUNTING CEMARA, MULIE NI KAPAS JALIN KIN RUJE, MULIE NI REJE SI KERNA RAKYAT JELATA
SIDANG MAJELIS SIMULIE RUM TUAH BAHGIE
LAGU PERI SINE, PANTAS KADANG LEPAS, LEMEM KADANG KASE TARING, PANTAS BERULO, TARING BERAYI, LEMEM BERTONA, RASA BANG I PERASA, MURUM-MURUM KITE MUSARA RASA
GENAP NGEN INI SEPATAH CERAK, PERI SEKELIMAH, BERTUMPU MI KITE KU TUAKAL, BERSERAH KU ALLAH, LEBIH BERUET KURANG BETAMAH, SITARING MARING, REMAMO LUAH MAAF KUTUAH BAHGIE AMPUN KU ALLAH,
BERIJIN.
WABILLAHI TAUFIQ WAL HIDAYAH
WASSALAMU`ALAIKUM WR. WB.
BUPATI ACEH TENGAH
Drs. SHABELA ABUBAKAR
