Ceh Ishak Ali*
Uahni rembiye beramuren
Resam dunie kin peraturen
Sene telege kin amat-amaten
Oya kati jema jemen peraturné mukemang
Lintang linto lahni jelen
Si memude olok di rancalen
So mana ume téwah berléwasen
Si enguk iperinen raum so enge ilang
Delé di jamu gaéh munuling
Sedep i pumu saputangan beriling
Bebujang oya enge unang-aning
Sesuk beriring waé murentang
Tumpit musiyu kepeke mulaeng
Si beberu sesuk beriring
Sayup-sayup pilu laengni suling
I soné renyel meling seruné urum gamang
Raum so méh ilang kuning
Ulung ijo émeh ósing
Supu serule ikot eking
Iukir genancing tanukni seladang
Sene telege menjadi sinting
Berakah i doyah menjadi eking
Janyi so enge genancing
Renyel isaring katan batang ruang
Enge eruh uken urum towa
Betul sunguh enge mera
Musalah saluh gere ne ara
Tetah mi cara belo urum pinang
Enti kiruh-kiruh kase laing ku jema
Renyel ibubuh kin pemera
Nantin tangkuh ume ni keta
Kati kona ku lues belang
Gere dele tenirone
Empus urum ume we si beraté
Koro kude kin penuripé
Emas murni maharé gere nguk berutang
Konotni cerite cocok béwénné
Selo ijule kase waktué
Mutungkah lawo jule mas kasé
Kati selese gelah tenang-tenang
Kerna enge cocok umé berumé
Enge musara anguk enge musara até
Enge musara peluk pepatah ne
Si mehaté aténte tenang
Laing si murasuk gere ipengéné
Munaos untuk jema delé
Kuren urum senuk kenaké jawé
Tujun maksuté kenaké musirang
Keputusen resam sedunge
Ilangsungen renyel mungerje
Bergegure jema mukamang
Peraturen gere cupe
Beta jemen beta besilo
Wo si memude kati kin kekenang
Resam jaman gere terpinahi
Turah itunung urum igali
Ku generasi ayu ni si paling mukemang
Ike resam iubahi
Oya salah urang Gayo ni
Peraturen gere ni asli
Gereke rugi taring ruang [SY]
* Ceh Ishak Ali ceh dari grup Teruna Jaya
