[Syaer Gayo]
Kha A. Zaghlul
Ijo Ilang
Lampu ijo berenyel liwet,
lampu ilang enti bebarang
ike nume langkah mera kona tilang
ringit wan béb nge turah kabang
Kacang ijo munamah tenege,
nguk i kolak vetamin kin rembege
kacang ilang lale tahe atan gegayang
jaunang gere muketujun nemén belenye
Langit ijo terang olok terang,
mupestak wan porak lao
langit ilang mera keserbun urum kemang
enti ukang ike gere mutenege
Lede ijo kutip jeplo,
Lede ilang mu iyok kucak murusaki batang
kupi gabah ijo barang ekspor,
kupi ilang mera salung kin tai ni musang
Mata ijo munéngon péng
mata ilang kerna peberngong mujegei beranang
ike gere mampu sana si tetéméng
ujut musédéng peberguk lagu atang
Baju ijo mampat i panang
baju ilang dedik lemu ike pelelintang
enta sana ralik enta sana ujung
kude lah ni nume minter néro kekang
Giok ijo i kenali jema bier atan pematang
ilang ni bere mera mesing lepat atan pemangang
aha mepat nge peri mestike taringni datu muyang
ike barang osoh turah tunin i rebut sangkan
Ijo tene ni murip tenang
ilang gabuk sabé gere mera tenang
sebet ni Nabi berani wan perang
sebet ni jin namat tali we girang
Ijo ni pucuk lemi wan lo soboh male terang
ulung ilang nantin ruluh kerna sataki tempos ilang
Ijo mera we peden jema diang-diang
ike ilang galip motehi salak ngalei jema senang
Sara legih ni ijo urum ilang
murahdi munosan kunci ku jema sembarang
mera neging bise sikerna ate semayang
bohmi seber serahen ku Tuhen simukasih sayang
Ijo urum ilang
teraku ijo terkam ilang
Ijo isesonék ilang
Ijo gere menet, ilang pemulo girang
Ijo pekingking ikot,
ilang purerengang
asal nge beta sipet ni tetung kapur
kite pukekamul wé dabuh munyirang [SY]
Kemili, 7 September 2014
Kha A Zaghlul.
Adalah nama pena dari Khalisuddin, S.Pt, akronim dari sapaan Aman Zaghlul. Karya puisi pertamanya yang berjudul “Bukan Belanda” termuat dalam buku Antologi Puisi 6 Negara Indonesia, Denmark, Thailand, Malaysia, Thaiwan dan Rusia “Secangkir Kopi”, The Gayo Institute (TGI, 2013). Lelaki energik dan visioner ini lahir di Kebet Aceh Tengah 23 Juli 1973, alumnus Madrasah (MIN 1 Boom, MTsN 1 Boom serta MAN 1 Takengon) ini adalah seorang penggiat media dan aktivis lintas sektoral yang gigih. Saer Gayo yang berjudul “Ilang Ijo” merupakan persajakan satir yang ia tulis berdasarkan real emvirisme. [SY]
