[Syaer Gayo]
Oleh Abdurrahim Daudy
Wo Suderengku enti mulo inger.
Aku male berunger kujema si nge bernikah.
Tikik nasehat mulo ari aku.
Ku upuh bajungku imel ni penosah.
Ini kutujun ku ko rowanmu.
Ku beyi beru kadang berfaedah
Emas pirak enggih ara i aku. Melengkan nasehatku cerak sepatah.
Warus berwajib ringen berberat. Menurut inget manat petenah
Nge jelas utang ni urang tue.
Tubuh si rige nge berkejang payah
Ama urum ine bermuhun ku Tuhen. Anakku rawan banan gelah sepapah
Jarak seteru selisihmi bele.
Peniron ni urang tue kepada Allah
Muhun ni ama ine beta le sabi.
Ko laki isteri enti dewe bantah
Si kune ni jema beta kire naku. Gelahmi anakku bahgie mutuwah
Uken urum towa dis ipanang.
Ipestik benang enti berat semelah
Uken urum towa ipanang rempak. Enti osah muliak gelah timang lah
Demikien ku ko rerowanmu.
Beyi urum beru enti dewe bantah
Enti sara ku bur sara ku paluh.
Nge salah saluh nge muperengkah
Gelah sepapah ko laki isteri.
Buge rejeki kati enti juah
Gelah sepakat urum ahli pemili.
Enti jadi beranyang delah
Rawan urum banan muturut payu. Enti lagu kuyu pungi mumelkah
Bersantan lemak bermanisen lungi. Ko laki isteri lagu tuen Fetimah
Uwet sari uwet kunul sari kunul.
Lagu kero sekemul enti mupepecah
Pantas berulo lemem beramik.
Ike salah tikik gere mukunah
Gelah tures jelip gelah terang simak. Gelah ijejak kati berlangkah
Enti ibubun kin barah ate.
Beru urum beyi enti mutetingkah
Gelah cere kasih enti cere banci. Sawah kutuyuh bumi enti berubah
Renih penyapih lulum pemaju.
Sipet ni beru nge lazim pernah
Sifetni rawan enti pebengis.
Mubibir manis urum fasih delah
Gelah rempak susun gelah rapat jalin. Berate mukmin bertangan murah
Gelah kuet imen gelah sunguh ibedet
Pemaren nasehat oya mulo kedah
Kiriman : Novarizqa Saifoeddin
Abdurrahim Daudy dengan nama pena Mudekala adalah seorang ulama di Gayo yang selain menulis saer juga sekaligus dapat menyaerkan dalam acara-acara tertentu,karena beliau memang memiliki suara yang merdu.
Tafsir Al Gayo, adalah salah satu karya sastra beliau yang di cetak di Mesir, Kairo tahun 1938.Lahir di Kebayakan, Takengon, Februari 1910, wafat tahun 1961 di Baleatu Takengon
