Dinda Syafa’a
Gerelku Sinta anak bensu ari opat bersudere, kami sara berine sekulah i MIN 2 Bener Meriah. Tulu sudereku nge mujadi alumni MIN 2 Bener Meriah. Taring aku mi we si sekulah i MIN 2 Bener Meriah. Kampung ton taringku i Kampung Serule Kayu gere gip ari MIN 2 Bener Meriah si berlokasi i Kampung Tingkem Bersatu.
Lokasi é strategis, dekat urum perkanturen Pemerintah Daerah Bener Meriah. Selain oya, dekat juga urum Bandara Rembele, Perpustakaan Daerah, lapangan pacuan kude Sengeda, kantor Kementerian Agama, Umah Sakit Muyang Kute, pasar Simpang Tige.
Walau pé i pusat kota kabupaten urum pusat Kecamatan Bukit si berhalaman lues, tetapi bangunané gere ilen béwéné permanen. Ara siwah kelas si berering papan, roa kelas berering triplek urum lanté si gere besemén, henye tulu kelas si bangunen né nge permanén.
Biarpé keadaen bangunen sekulah kami si lagu noya gere menyurutni semangat belejer. Kami bangga sekulah i Min 2 Bener Meriah, kegiaten belejer i MIN 2 Bener Meriah sawah ruhul. Ara juga kegiatan ekstrakurikuler si delé pilihené. Ara ekstrakurikuler wajib lagu tahfiz, tahsin, urum prakték ibadah.
Sedangkan ekstrakurikuler pilihan delé juga pilihané. Ara kesenian tari, kesenian musik, marching band, budaya Gayo, didong, seni lukis, silat dan karate.
Ara juga kelas smart classroom si kami sebut urum kelas digital. Belejeré paké laptop urum handphone, lengkap tersedie urum jaringen internet té. Aku salah satu peserta didik kelas VI digital. Ari kelas lime nge bergabung urum kelas digital.
Jep kelas muridté delé. Ike upacara bendera lo senén urum senam soboh. Halaman sekulah si lues terasa sempit, sawah motor urum keréta ni guru-guru gere pas parkir i halamen sekulah turah parkir i jelen kul.
Walaupé delé muridté, tapi jarang terjadi kéroh antar murid, béwéné peserta didik ké jejeroh. Kepala sekulah urum guru-gurué béwéné jeroh. Ara sipaling mu nos aku mukalé, beluh jajan i kantin sekulah. Kantin si bertempat i kuduk umah sekulah urum pemanangen ume si ijo i kala musim tanam, menguning i kala musim panen tibe.
Serlo dih né gere sekulah nos mukalé. Serlo pé aku gere mera libur. Tapi, ama nguk ku ucep nge tulu lo aku gere beluh sekulah. Serloni aku baro nguk sekulah i jule ama ku nik keréta mérék Honda.
“Sinta, kasé ama murai jem tige nge mari ekstrakurikuler boh nak.” Kené ama saat aku munyalami besinen i arap pintu gerbang sekulah.
“Boh ama.” Jewebku.
Setelah munyalami satpam urum guru piket si nge munampi i pintu gerbang sekulah, aku pé remalan ku arah kelas si paling ku kaléi. Pong-pongku béwéné menyambutku urum gembira. Berebut malé kunul dekat-dekat urum aku roa pong si akrab urum aku gerelé Maira urum Ani pakéa roané si berhasil kunul i kuen urum kiri ku.
“Oy Sinta kusi ko sidah lo ni ?”. Kami mukalé.
Kune ujien mayo ku pesantren Banda Aceh?. Buge lulus.” Kune Maira.
Sesire tersenyum, aku mujeweb pé
“Aku tes mayo pesantren i kute Banda Aceh. Alhamdulillah tes é lancar, cumen hasil lé gere betih ilen. Berijin kin doaé buge pong-pong béwéné lulus melanjuten pendidiken.”
Nge sawah waktu bél meling iringi ling guru liwet microfon.
“Kelas tige sawah kelas onom nge nguk istirahat.”
“Ku kantin, ntah!” seru Ani.
“Ntah, aku mukalé kin kantin te.” Jewebku.
Urum Ani, Maira kami menuju kantin. Sawah i kantin antrien nge naru. Butuh keseberen muhadapi adik-adik kelas si tengah jajan. Arasi tengah mumilih-milih makanen né sehinge munemén waktu. Ara séba lén si ipilih len si i belié.
“No, mulapéwé, adik kelas teni delé-delédi jajané.” Kené Ani sesire merengut.
“Kite sine santai tu remalan né jadi lemem sawahé. Inget masa kite oyawa malah lebih parah ari adik-adikni.” Maira si bijaksana cube munetralen.
“Kunul iso ntah sire munéngon pemanangen,” ku cube munengahi Ani urum Maira.
“Oh boh, Sinta selain manis, baik budi wé suka keindahen alam,” jeweb roa pongku urum kompak.
Aku pé tersenyum mumengé pujian pakéa. Kami pé menuju kursi si ara i balé-balé i arap kantin. Ari tempat ini béwéné pemanangen teridah jelas i arap ni mata.
“Musim panén rupenné, malé gere ku érah pemanangen indah ini.”
“E Sinta, musim panén ke singket waktué. Nge tulu lo petani panén rom. Kedang mera serloni mari panén né.” Maira mujelasen hasil penéngoné wan sidah lo ku kodokni.
Uwih mata ku munetép, hal ini munoboh Maira rum Ani bingung. Spontan pakéa munolik aku.
“Ipak manis hanati mongot?” Pakéa mungune. Urum segegiken ku jeweb.
“Gere lemem né kite tamat, pemanangen ini gere pas né kite nikmati. Kite pé nge bersekulah i sekulah ayu kite pé mupisah. Nye mudemu pong ayu.” Jewebku.
“E, geh. Besilo roa bulen mi kite bersekulah isien. Roa minggu mi kite malé ujian.” jawab Ani sesire meluahen olik ké. Sehinge tulun kami mongot sire berolik mien.
“Hai, mukune ini?”. Kune ibu Erin wali kelas kami. Kamipé gintes.
Kami muningeti perpisahen si gere lemem né ujian akhirpé taring sidah lo mi we.
“Oya le, ibu pé sedih, tapi ibu pé bahagie.”
Sesire kami hapus loh mata, bersiérahen bingung Ani mungune,
“Hanati ibu bahagie mupisah urum kami?”
Ibu Erin munepok kerlang kami sire begegantin sire becerak.
“Kune gere bahagie, ke kite mupisah kerna waktu kam sekulah isien nge sawah. Nge saaté mulanjuten ku pendidiken ku jenjang si lebih atas kin muraih cita-cita.” Lanjut bu Erin sesire tersenyum. Ara i antara kam béwéné si gere mera tamat ari sekulah te?”
Spontan kami kompak mujeweb, “Gere, bu. Kami malé tamat ari MIN 2 nye mulanjuten ku sekulah si lebih atas mien. Cumen kami gere mera berpisah urum sekulah te nye pemanangen ume si ijo lues mubentang.”
“Nah, oya baru anak ni ibu gerelé. Kam tetap anak MIN 2 Bener Meriah. Selo kam libur énggéh dediang kini.” Kené bu Erin.
“Boh, bu.” Jeweb kami.
“Kam nge jajan ke? ini ibu nge ari kantin lanjuten jajané. Ibu nampin kam i kelas.”
“Gere ilen bu.” Nye kami besinen beluh ku kantin. Sawah i arap ni kantin gere ara né makanan si i juel ibu kantin béwéné nge méh lagut.
“Kuneni kite ekstrakurikuler kasé. Aku mulapé gere ara mah bekal mangan ruhul mien.” Kené Ani sesire munamat tuke é.
“Sine waktu kantin enge sengap, ibu talu-talu kam, eh kam gere mumengé. Ibu érah kam mongot, ibu bingung mukune de kam. Pas pedéh tengah ara ibu Erin isien. Nye ibu ceriten kam si tengah mongot berjamaah.” Kené ibu kantin.
Mumengé jeweben ari ibu kantin tulun kami kedik murum-murum sire mujeweb “Kami mongot kerna gere mera mupisah urum ibu kantin kami si baik budi.”
Ling bél mayo kelas meling, kami pé tir munaringen kantin.
Wan perjelenen menuju kelas kusawahen ku Ani rum Maira. “Roan kam aman. Aku mah bekal delé. Bekal mangan ruhul urum penan si tos ine. Ara juga keripik pisang oleh-oleh ari Banda Aceh kasé tulunte mangan ruhul ari bekal oya boh.”
Sawah i kelas sengap ilen né, renye ku uweten jajan ari tas tulun kami menikmati gutel rom lepat penonosen ine. Kamipé gere lupen munyiapen makanen tradisional kin ibu Erin. Gutel urum lepat nye keripik pisang si ibagi kin pong sara kelas.
***
Lang lo setelah pelajaren PJOK, Ani munajak aku rum Maira mengelilingi sekulah. “Aku kadang ku pasantren Nurul Islam Pintu Rime Gayo, Sinta ku pesantren Banda Aceh, ko Maira?” Ani mungune.
Jawab Maira,”Dekat we! MTsN 1 Bener Meriah.”
Urum berat rasa ni até kuceriten kecamuk ni jiwe.” Kelem ne ama cerite ike ama Minah tugas ku Banda Aceh. Aku sekulah i ibukota provinsi ike ngetamat kasé. Kami séke minah ku Banda Aceh.”
“Ino…Kite gere murum-murum né yah!”. Ani munyela.
“Kami nume mosop pemanangen halamen kuduk sekulah si indah pedéh. Rupenné, mosop Sinta sekeluarga. Kite gere pas murum-murum né.” Ucep Maira si mongot. Tir-tir kuhapus rasa sedih urum kelimat nasehat.
“Enti mongot né, kasé lagu mané nge meh jajan i kantin. Si penting pertemanan te si nge lememni tetap lanjut keti enguk meraih cita-cita.
“Sebelum tamat rum berpisah entah puesen munéngon pemanangen sekulah te si indah ni!” Seru Maira.
“Entah, tapi mayo mulo ku kelas pelejeren matematika menanti. Kite turah giet belejeré kati pas mejeweb soal ujian kasé boh!. Kati kite lulus ujian. Kasé gere ara remedial urum nilai jeroh!”
Aku urum Maira bersiéngonen bercampur heran. Ani pong ni kami serloni enguk bijak rum dewasa pemikirenné. Roan kami bersiéngonen sesire berucap “Amiin, baik berijin bu Ani atas petuahé.” Sesire kedik bahagie tulun kami menuju ku kelas si akan mujule kami menuju masa depan. [SY]
Selesé
*Penulis sibegerel Dinda Syafa`a kunul i kelas VI Digital Min 2 Bener Meriah. Selain mengaji, wé aktif i karate KKI Bintang Rimba Raya Bener Meriah. Keseriusenné i bidang karate mujuleé mujadi juara 2 karate provinsi wan ajang turnamen Pangdam Provinsi Aceh. Lahir tanggal 03 Januari 2013 i Barito Kuala.
