Zahra Fitri
Dina urum keluarga beluh liburen ku Danau Lut Tawar. Si mu ton i Kute Takéngon. Pakéa merencana mujerang masam jing gulé depik i Danau Lut Tawar.
Lut Tawar oyale sara ton dediang i Aceh Tengah. Lut ini i ringkeli bur si mujulang atas. Pemanangen é belangi pedéh. Deléwé batang nuyem si mȯrip mununung jelen, mu nos perjelenen ku so gere mubosanen.
Tujuen Dina urum keluarga oyale Panté Ketibung. Panté ini mu ton i ujung Lut Tawar. Pakéa muliweti gue Putri Pukes. I soné jema dediang nge engkip mumedeti ton terjadié legenda Putri Pukes si mujadi atu. Kami sawah i Panté Ketibung pas jem lapan soboh. Alam-alamen ton dediang ni lues pedeh.
“Kite pilih ton si kin mu nos tenda?” Kune ama ku Dina.
“Ton si semelah kiri o deh, ma”, jeweb é sire munulok ku arah selatan si isi ton é longoh pedéh rum muhedepen langsung urum lut.
“Boh……ntah kite mai béwéné peralaten ku so”. Jeweb ama.
Ama munyesuken sara tenda ari uluh, Dina teréngon mubantu ama mudenang alas. Gere lemem tenda bueten amangku nge sesuk rum megahé.
Pakéa renye istirahat mungumpul tenege sire mumanangi pemanangen lut si belangi. Perau-perau nelayan ilelah ni lut teréngon kucak pedéh. Si isi pakéa mumerah gule i lut ken mata pencarian.
***
Olokdi ku rasa bahgie dediang i Lut Tawar. Delé warga urum masyarakat si mumérah penghasilen ari hasil ni lut. Waktu tengah gure remalan i geniringni panté, Dina gere sengeje metuh nye kedéngé luke ringen. Erlina aka ni Dina enggéh mudekatié.
“Dik, hanati nguk metuh urum kédéngé luke oy?”. Kune Erlin rum gintesé.
“Aku gere néngon ara atu iyoné kak nye museltu”, perenné sire munulok ku arah atu.
“Lang-langen, remalan lebih arih-arih mien”, pesan Erlin urum perhatien.
Gere pemanangné ari oné teréngon Sara bapak nelayan si lebih tue ari amani Dina munikot perahu e i geniringni lut si gere gip ari ton keluarga Dina. Amani Dina munyeraki bapak nelayan oya sire mungune.
“Hana si tengkam bapak lo ni, pak?”. Perin amani Dina ku nelayan oya.
“Gulé depik, pak”, perin nelayan iya sire munuruh ku arah perau si engkip urum gulé-gulé si kucak-kucak.
“Sara kilo sidah, pak?”. Kunei amani Dina mien.
“Sara kilo 75.000 dih, pak”, jeweb nelayan oya sire senyum.
“Aku beli roa kilo, pak boh”, perin amani Dina sire munuet dompet i béb seruel é.
***
Amani Dina munosah sén ku nelayana rum munerime sara plastik gulé depik. Urum senyum, ama munyerahen ku Dina. Ine nge munyiepen alat mujerang. Pakéa memang murencana kin njerang gulé i geniringni Danau Lut Tawar. Dina murasa bahgie nguk mubantu.
“Ne, kali ini njerang hana kite?”. Kune Dina penasaren.
“Kite malé mujerang jantar masam jing gulé depik” jeweb ine sire munyiepen bahan-bahan é. Ine munejeri Dina langkah-langkah mu nos jantar oyane.
“Pertama, kite bersihen mulo gulé depik ni”, kené ine sire munuruhen cara mubersihen gulé orom arih-arih.
“Méh oya, kite siepen bahan-bahané”.
Dina munyaksinen urum-urum. Wé mucatat langkah-langkah munos masam jing.
“Bahan-bahané hana pelin, ne?”. Kunei Dina kenak é betih.
“Bahan-bahan é lede, poa, seliming, lasun ilang, kuning, rom poa”, sebut ine sire munyiepen bahan-bahan oya.
“Méh oya, ne?”. Kunei Dina mien.
“Béwéné bahan oya ialusen. Nge halus béwéné bahan ibaluten ku gulé”, jelas ine mien.
“Wah… cara munos é gere susah, ge ne”, kené Dina sire munyusun gulé wan belanga. Akhéré méh be sidahen waktu, jantar masam jing gulé depik pe tasak. Pakéa kunul murum i wan alas. Pakéa munikmeti pemanganen si nge i siepen.
“No… sedep pedéh ini, ne”, kené Dina.
Ben ini we munyube masam jing gulé depik. Suasana mujadi tenang, ling ni wih si tenang rum ling manuk becico i sekiter. Mangan murum munamah pemanganen tamah sedep.
Dina murasa bersyukur nguk berdediang urum keluarga renye belejer munos pemanganen tradisional si sedep. Liburen i Danau Lut Tawar gere hanya mubahgienen we, tapi jugak munamah pengalamen berharga tentang budaya rum kebersamaen. [SY]
*Zahra Fitri, anak pemulo ari tulu besudere, ari pasangen Sabri rum Hajar Hasnah, mucita-cita mujadi penulis novel terkenal rum mujadi dosen, muhobi kubaca, munulis, rum benyanyi.
