Salman Yoga S
Kuinget sat oya ulen sembilen, ketapé gere kuinget tanggal pien den lao sana ketike imai ama kami ku Kampung Kuteni Reje. Sara kampung tue i Kabupaten Acih Tengah bagien ari Kecamaten Linge.
Jelen ku daerah oya tanoh ilen, meskipé sebahagien déba nge beraspal i ipepien tékongen nge ianut wih ni uren.
Jarakké ari Kampung Linge si ara situs sejarah Kerejeen Gayo masa lalu gerele gip tu, ya sekiter lime kilo meter we.
I kiri kuen ni jelen ara baur den kerpé mubelang, sebahagienné mörip batang ni uyem si nge ijo urum ulung den pucukké lagu lidi munilok ku langit ijo.
Senaru ni dené wan perjelenen kuéngon pepien jema mulintes sire munemah tali den sara parang i pumu kirié. Kené ama pakéa penduduk isoné simunalo koro örip-öripenné, i kuduk ni baur den arul-arul pematang.
I daerah ini simen teridah koro mutanuk mulengkung ku atas lagu huruf “U”, urum jangut berwarna item mupenaram mugagut kerpé iseselang batang ni uyem den sesampé.
Seseger pakéa mumengé oékn é lagu tengah munalu-nalu anak atawe rakanné. Sebahagien ati tanuk ni koroa ara simulengkung ku tuyuh lagu huruf “M” urum warna ni jangut den kulit jegeté.
Bahkan ara sara koro justru semelah tanukké ku atas den semelahmi mien ku tuyuh lagu huruf “Z” mubalik.
Nge rap senye, kami wan perjenenen ilen. Caya ni mata ni lao mutampir iseselang ranting ni uyem. Ari gip teridah pepien koro remalan turun ari atas kuduk ni baur itetunung empué tar kuduk.
Ini sunguh pemanangen si olok jarang, koro remalan bebaris iseselang batang ni uyem isiremi cahaya ni mata ni lao senye ari élopen. Dis lagu sara lukisen, si bagin paling atas berwarna mupenilang den bagin tuyuhhé berwarna gelep mupenijon.
Mupepienen ine sempat munirö turun kati ama muneduhen kendereaen den munijinenné turun kejeb mumanang pemanangen si jarang den belangi ni.
Mungabadin suasana senye laö den mumotrét urum hp kolak si ijejontokké, mejen ine arap sesuk pelin we muhedep ku arah kiblat lagu tengah takbiratul ihram lagu malé semiyang, perasankuse.
Kampung Kuteni Reje aréa i ujung dené, jarakké iri Kute Takéngen Kabupaten Aceh Tengah sekiter 70 kilometer. Kené ama oyawa penduduk kampung ini sunguh simen den rami. Ketapé kerna ara sara kejadin pudaha penduduké minah ku Kampung Delung Sekinel si berbatasen urum wih Jamat.
Meski demikien pepien petani jeb lao ara simulipé ku serappa, kerna i kampung ini ara perumen raom den empus dorin, pakéa siempué.
Kampung Kuteni Reje ni iamik urum roa wih kul. Sara wihhé jernih den sarami wihhé lagu mupengeruh. Wih si jernih kolakké gere kultu, aréa persis isemelah timur.
Sarami mi wih kul si deras den keruh berukuren olok kolak, ari ibagien tenggara. Wih kul ini kalaé ku Lukup Serbe Jadi Acih Timur.
Kampung Kuteni Rejeni rupen taon asalni ama ni ama atau awanku. Oya kati kami ipakati den imai ziarah sesire dediang ku ton ini.
Kayu i Kampung Kuteni Reje ni ijo-ijo ilenné, batang ni dorinné juge olok kul-kul den atas-atas, deba ara singe muselpak, deba ara si mudodoh, muleno den mutéwah éyup ni kuyu badé.
Tempéh ni umeé lagu anak ni kite munuju ku pucuk ni baur, beriring gere muaturen urum ukuren mubeda-beda. Ari masing-masing tempéh ini mujaril wih samung-munyamung hinge metuh ku wih kul.
Gere gip den jarak tu ari wih jernih ara sara umah kul berrering papan. Kené ama isienle oyawa wé ilahir ni anan.
Ketapé sat ini umah oya taring sara pasang jemami we. Awan-anan si biasa italu urum geral Awan den Anan Sur, pakéya biak ni kami ilenné, kené ama.
Aku olok galak ipakati dediang ku Kampung kuteni Reje ni, selain simen uwah ni kayu, jemaé juge ramah-ramah, déba tukang berakah.
Apalagi Awan Sur den Anan Sur, hampir jeb lao pakatié aku urum engingku ralan-ralan mumérahgule atawe gulé sesire muniri ku wih jernih. Besemet.[]
