Salman Yoga S
Koro Mawah
Remalan munété tepi ni wih, muatu-atu kul den muatu kucak-kucak. Senaru geniring ni wih mudené kucak lagu patal ni ume. Kéngon Ine remalan i kuduk ni Anan betéméng time, aku nunung tar duru galip mupetimang jeral ni jelen.
Senaru ni patal geniring wih gere lagu jelen biasa, ketapé muatu den mupaya. Ike gere arih-arih mera kite musentat. Kerna selain atu ara déba batang ni sesampé, kepé tetusuk urum uyet ni kerpé museserit ku perdu ni kayu den mujorol kowan jelen oya.
Jarak ari roda ku umah ni Awan den Anan Sur gere jaraktu, kire-kire ara due puluh depa, temas-temas mengé ike ara si mutalu ari roda atawe sebalik é. Cumen umah ni Awan a lagu olok muatas ari rak ni wih, perumen den perempusen, kerna tanohé wan buntul sehinge temas mumanang ku kuwen ku kiri.
Ike kite pecéngang ku élopen ari tingkep ni umah teridah supu umah ni jema i Kampung Delung Sekinel den sebahagien Kampung Jamat. Perumen ni jema simudenang lues, perempusen dorin den ara jarang-jarang batang ni keramil urum batang ni pinang.
Seseger arawe kasé mulintes jema mubio koro, mulipé wih urum awisni upuh kerung i kerlang den parang i pumu kuenné. Remalang muiring lagu berbaris munung jelen kucak.
Kené Awan Sur koro oya déba ari si koro dirié, ara déba koro mawah. Ari gere pemitihenku ari penyeder ni Awan akupé mungune.
“Wan, sanake koro mawah ni Wan!”, pengunenku ketike kami nge sawah ku umah.
“Emm, sana kati kati oya pengunenmu Win?”, kené Awan sire mubalut ulung lipah rokok é i tungkik ni dapur peniten.
“Gere le Wan, koro mawahni warna nijangutté ke atawe bentuk ni tanuk é ke Wan?”, sut ku.
“O, mawah ni nume warna ni jangut”, jeweb Awan
“Keta koro sana ya Wan?”, pengunenku mien.
Seketika Awan Sur munetahen tempat kunul é, semile den beséré ku rering. Kéngon uluh lipahé ipeputer é, seseger iséluk é den munemusen asap é ku atas. Mari oya pecengan ku aku si tengah pecéngang ku deret ni umah.
“Kini keta kunul!”, kené Awan mungirepi aku.
“Boh Wan!”, sut ku.
Gere lemen ari oné Ama pé sawah ari roda den langsung renye kunul i serapku. Demikien juge Ine, Anan den enginku Nila. Sebelem Awan mujeweb pengunenku tentang mawah isi ni umah nge murami mien lagu biasa, sehinge umah papan oya lengkap rasa é rum seluruh anggota keluarga.
Ine renye mujerang ku dapur, Anan munueten nayu kertan é den Nila lal é urum simang uwah ni kemili é i lamung ni Anan. Sementara aku tetap munanti jeweben ni Awan si kéngon gere ilen isuti é.
I deret ni umah tenengé uren muloi turun rét-rét. Kuyu beremus berdeso ari ulung ni dorin ku ulung ni awal si si simen wan perempusen. Seseger mukelibeten cahaya ni kilet i geniring ni bur ijo si jarak.
Kampung Kute Ni Reje si biasa é muhawa pesam langkah ini lagu mubengi pora kerna uren den emus ni kuyu musim rom seroh. Ketapé bengié gere sawah lagu i Takéngen atawe lagu i Buntul Kemumu Ponokbaru, si mejen mera nos kite gegiren kerna sejuk é.
Kebetapé dapur peniten ni Awan Sur tetap mubere urum sesongkoten batang ni asam den batang ni rengkenil kering. Asapé mejen mukepung sawah kite pé mera matuk-atuk. Cumen sideléné asap oya tangku mulalui bubung ni umah ku langit.
“Jadi mawahni artie bagi due Win!”, kené Awan Sur.
“Bagi due maksute kerat due beta ke Wan?”, sut ku ari kerna gere pehem é.
Tibe-tibe Ama, Ine den Anan Sur kedik mugagak mumengé jewebenku. Aku heran sanade si salah ari pengunen den jewepenku sehinge se isi ni umah kedik.
“Nume lagu noya Win!”, kené Awan Sur wan sil ni até wé.
“Koro mawahni maksut é bagi anak ni kroro. Tun ni ke lahir kin si mumerala, manak ke tun kasé mien baro oya kin kite atawe kin si empué. Beta le ya!”, kene Awan Sur mien.
“O, beta ke ya Wan”, kenaku.
“Beta kumpungku!”
Ama, Anan Sur den Ine kéngon gerené kedik lagu sine, ketapé senyum seulah pengunenku ara mamfaaté kin pemetihen wan mumeralai koro i wan budaya Gayo. Besemet. []
Baca Juga : [Novelet Bahasa Gayo] Jingki Roda Wih Kuteni Reje (bag.2)
