[Puisi Bahasa Gayo] Pulihmi
Hasrin Z Bersah
Jangkonpé penjurahenni
Wan kemul ni pumu kasé betuni
Sediken ara kasé siberaté geli
Kin tawar bengi mumulih ni rembege
Urum lemut padihné beperi
Luahen cerak munetus ni janyi
Sikerna gaéhe gere bemai
Keta renye i rai si sawah mujule
Taonné méwén turah i nyatai
Tunung tapas bier beringi
Jujung ni nemahé ara muperasi
Senawat kuen kiri kati telas tene
Arani bise asa gere bebeli
Simunosah we bekenak sabi
Nemah ulakké turah bepengembali
Dibung berisi tinih betimpe
Jamutenpé si niro mat jari
Sisesuk mokot silemem penampi
Sabé berongot gere nuruhen diri
Iwan ni nipi munuruhen rupe
Gaéh munyino ari sara sagi
Menet kunul beasi asi
Kati selesé turah i kunei
Kire gere salah pari taonné semile
Gerak mujentik ralan wan usi
Pongot rum kedik silih beganti
Uwes ni até gere i iroi
Sikerna tetaki gere berede
Tiro tolong ku Illahi Rabbi
Bele seteru gelah i jarakmi
Tubuh si bise kire pulihmi
Ari ilet dengki enti né munimpe [SY]
Takéngen, 2021