[Puisi Bahasa Gayo] Rejeki
Hasrin Z Bersah
Ari langit nge metuh
Ari bumipé nge tangkuh
Gaéh ni rejeki gere beteduh
Ike mera sunguh pasti mendepet
Si bepari gere mupepinah
Si betuni gere teridah
Nge mepat simunerime amanah
Turah kin nemah ike pané munuet
Bejelgit ike si atas
Bekuruk situnung tapas
Rejeki ni mata bierpé mubatas
Turah telas sawah ku hakiket
Kul kucak é nge mepat
Naru konot pé nge méh tepat
Delé tikik é gere nguk jengkat
Jeroh i amat si ringen beret
Ara ari ulung si turah i géték
Ara ari uwah si turah i pélték
Gigih betamah kati osop hék
Gerené cebebék si atas derjet
Si besirem gere sesop
Si bejemur gere né osop
Kekire enti ara jekop
Langak lungkep mera kasé pipet
Betengkam ike si luah
Beperala si jangak juah
Temetap gere mupepinah
Mupaédah si hemat jimet
Ara gere é mutetah tentu
Ketier usaha oya si perlu
Sepeden kiding urum pumu
Akal turah naru kekire enti singket
Seber urum ikhlas oya si penting
Do’a ku Tuhen enti sampé taring
Asa denie muputer jening
Ringkel keliling rejeki mulibet [SY]
Takéngen, Ulen Satu 2024
