[Puisi Bahasa Gayo] Lime Asu Tue i Tugu Kute Takéngen. 6
Salman Yoga S
Kené jema tue ike ara asu munangung
Oya tene iéngoné makhluk alus mulintes
Seumpama upuh kerung igerbes mukipes
Sediken muserempuk libet penawaré i tebes
Doa sebengang jimet uris hafal lebes
Ara sara sipet belangi ni asu si lime ni
Ike ku masjid gere mera olok mungunah
Gere mera mayo den mulibetpé waé ku mersah
Erep ideret ni peger we kadang mejen murulah
Oyapé payah ike sediken gere igangui
Geralung pangka gere keras mukaing
Seulah betihé isi tempat si muperlu sunet
Isi taon si geniling sigere nguk olok meling
Asal ike nguk ilen iging gere dalih ambil pusing
Cumen inget kenge oloktu sakit den genancing
Si penting a pé perasanné gere penting
Renye selap mudedik munyatak ni pangking
Paké si limeni buetté asal sabé derong
Ike korong gere merapé waé moyong
Paling jenyong-jenyong pejejik lagu tolong
Pulelentik lagu pepeltik i atas ni tersik
Mengok-mengok tingok lagu nantin jontok
Ara lime asu tue i Tugu Simpang Lime
Setie é dis urum asu
Seheje é mulebihi jema gemadé
Merké gere rajin si deléné
Kin penyaruten macam berbagé
Dak ku maté iegingné
Ara lime asu tue
I Acéh Tengah Kute Takengén
Besiloni lagu gere gatituné kuéngon
Gere penahné bererebahen wan semén
Asal biasaé soboh lao merawe bedaring
Rap Tugu Simpang Lime tingir ku geniring
Rawan banan isoné bergelamen
Takéngen, 2014-2021
* Dipetik dari Buku Antologi Puisi Bahasa Gayo “Likes” Bab “Takéngen”, hal, 8-15. Takengon: The Gayo Institute (TGI), 2021.
