Oleh : Iwan Kenangan*
I cube mien mugores ni pena koan kertas poteh, male mulokes sesara kisah buge engok ken ules nome wan musem uren, buge engok ken payung teduh wan musem kemaro.
Tabi mulo langit si kami jujung seringkel paying, maaf mulo bumi si kami jejak seringkel tapak, ampun ku Tuhen maaf ku tuah bahgiente.
Ini male kami rike sifet makhluk ni Tuhen si dele pelejeren si ngok kite uwet. Maksud ni ate ku hukum enti kase belle, ku edet enti kase pipet, keti engok i bedan siken resam siken peraturen.
Dele corak orum curakke sifet ni makhluk ni Tuhen si bermacam bage bentuk orom rupe, sibenare si paleng mulie orom semperne oyale manusie, keti I bobon manusie ken pemimpin iwan ni donya.
Ara sara makhluk ni Tuhen si perlu kite renungen ku ate dirinte, oyale kude si opat kiding, si behu ken penemah, si pantas ike musangka, gere mulewen sediken depak depuk katas tubuhhe.
Keti rumel wan agama halal orom haramme dengke ni kude i pangan umet ni nabi, rupe e ara sifet si gere engok kite emah wan morep te. Sifet ni kude mera pujejingket orom pelelumpet ike remalan ringkel kampung.
Mera mutanggak ike munerah pong atau lewen, mera munipak ike dekat kite ku kodokke, mera munyekap ike i jurah pumu ku arappe. Wo kude tesana keti mera muneragong ike i amat songom si tiwel semelah.
Inile sifet ni kude sigere layak orum laku si kite conto wan morip bermasyarakat. Sifet si munorohen sepuh, sabidirie geremera sepeden, oya keti gere mera tumung peden sabidirie.
Ine wow kude, te sana keti musangka mejen keras mejen mugeritik, mejen turah i tegu kekang, mejen turah i besik, mera mien musier gere sawah ku ton si tuju, mera munarungen peger si kerna mugerutup.
Artie mejen mera mengen manat mumejen mera gere mengen manat, waktu gantine mera tuke dirie mulo i tentunne, blle mumungen sara tempeh penegelen.
Wo kude sipetah ejer, te sana keti i bekam si gere neh bergune, nge itekaren ari wan tubuh dabuh mien i ulaki turah i cemoh orom eong si kolak ku luang. Kude si patah manat, cube i simak orom rupe mu si geger, enti kase meh gegeh jema munoleng pakan, dabuh gere kin tepenueten.
Eleh kude, wan lues belang galip pu sesangka, galip perangkam sabidiri rusak kerpe si mu pucuk lemi. Sayangmu kude, igu wan patal i bobon kurongok, mejen ken munegel mejen berenok, sampe repuk tubuhmu munebah beben.
Sawah ku lapangen gere neh beriro sesi rawan sesi banan, orom kope beradu murebut ken ulu, ko kude si nangkohen alak munajur sara bedenmu manusie si munerime hasil emas orom pirak, ari gegeh orom payahmu.
Wie kene kite renye ku kiri, wu ku kuen kene kite renyel ku kuen, beta le rupen ko mumengen rintah, kune de kene kite?
Jadi mulo keta niko dedak sara centong orom poa sara jontok i tamahhen mien kerpe simu pucuk lemi, ken imel ni payah kejangmu.
Betale kire sifet ni kude si turah engok kite bedan jeroh orom kotek ke, ken ihtiber ku tuah bahgiente murip wan ni donya. Kude si musifet rie gere engok kona ku kite manusie si mu akal orom si mu kekire. I bobon ter arap daboh mungeltes i bobon ku kodok daboh munyekap, tene ni kude gere pas ken conto. Daboh mien munyegir orom muhiheh ike munengon lewen, te sana keti turah beta niko perangi.
Eleh mile keta, asa nge beta bang ni ko, wo kude.
Dele kotekmu dele simen jerohmu, ike gere kerna gigihmu manusie si berume gere tures ike munengel, gere lumet ike gere iperjakki ko. Gunemu kude ken manusie dele simen, cumen sifetmu si kotek kenakke enti sampe i conto manusie.
Manusie si ken penatur ken pemimpin wan donya i jadin ni Tuhen buge lepas munatur den mubedan sesi si hak orom sesi si batil. Kenge sawah janyi kene Tuhen turah kite akui salah orom dosa si nge iperbuet selama morep wan donya. Ara pe si lepas munolong oya amal ibadah orom ilmu si bermanfaat.
Berejen
Semantung mera we silep semerlep mera we lale, ampun ku Tuhen maaf kutuah bahgiente. [SY]
