[Saer Gayo] Hakimiadi Rawe
Muneritit
Mubelang lues ko ume
musim nuling nge ara tene
tumpit mukamang berkekede
pasang tetakut langkah mumiyo
Kekanak sedang munaos peden
entah ku ume nos perbueten
langkah neretet si kuceritenen
oya nge resam ni jema jemen
Oloh ines boh itarahen
lainge loteng lagu jerejeten
gerico tompet kiri rum kuen
lagu sitalu bersisauten
Boh pengantih makin belangi
rojok kubeden lagu singeri
taos umah ton temuni
buge ken hasil si ulu putihni
Dele simen cara muneretit
ara begetah rum doran serit
sentan com kedeng nye mukerancet
seba kudoran beden melelit
Ini cerite nge male punah
kadang ku anakte tareng sjarah
ku gores gores bng ujung ni delah
kati muneretit ni enti tareng kisah
Arul Kumer, 2019
[SY]
