[Saer Gayo] Tambang den Sejarah Linge
Oleh : Hakimiadi Rawe Arul Kumer*
Asal ken awal male osop seni sejarah
Karna penjajah arisi kenake
Macam berbage cara ni fitnah
Sikerna sekulah orop tamatan SD
Asal mosop awal pe bene
Kusi die ke i kune pe
Tanoh Linge punah ahere
Karna ekonomi nyanya ilene
Siken reje jema si salah
Si buet ne pe gere betehe
Male i osopen bukti sejarah
Seribu macam seni carae
Merahi emas wan tonoh ledak
Lagu cacak nengon hasile
Makin sesilon cahaya ni pirak
Bumi pe retak kase hasile
Kupi Gayo male berahir
Sikerna mahir kengon carae
Tambang emas male iyuke tabir
Buntul Linge pe pasti mosop ahere
Kusa male aku mungadu
Gere mepat empu Gayo-ng ku nipe
Sediken tambang jadi selalu
Keta berahir khasiat kupiku
Melie ni reje sikerna pangkat
Jelas rakyat si mumilih he
Tap ni tambang ama pe jenkat
Udah ken mudarat wan jabaten ne
Asal Linge Serule awale
Oya tabiet ni urang gayo
Sediken mosop kase sejarahe
Sanah mi bukti ken siarapo.
Anak kumpu pasti mungune
Sanah mi die siceritepe
Nge meh osop ama pedeh te
Mungkin ke ine ude ngarang cerite [SY]
Arul Kumer, 2020
Hakimiadi Sudirman Rawe adalah pencinta sekaligus pencipta puisi dan Saer Gayo dalam Bahasa Indonesia dan Bahasa daerah, lahir di Janarata pada 1987.
