[Saer Gayo] Sajadah, Oleh : M. Isa Arita
Sajadah
Bentukmu opat sagi belangi kao kuérah
Pesantir wan ni tali rasmi ara jeb umah sajadah
Jeb lao kuingeti pasti mudemu turah
Jeb waktu ko kurai lime kali beribadah sajadah
Baumu harum wangi mai ibi mejen ku doyah
Paongmu bulang péci beluh sabi ko ku mersah sajadah
Denang sagi kusagi jema rami sesuk terarah
Ipengéko gati-gati ayat suci suret fatéhah sajadah
Sajadah ruje mutentu ruje beludru ari Mekah
Gambaré gere ragu i atasmu gambar ni Ka’bah
Sajadah paling perlu kené tengku alas munyemah
Semile berlembuku mejen aku ber-Laila haillallah
Sajadah o sajadah kumai beribadah
Sajadah o sajadah kumai beribadah
Gere kosah ko murébék ike koték ko sesah
Ku jemur mujerélék lipet lemék gere basah sajadah
Ke i pinyem anan alik bidik-bidik turah kosah
Kujurah urum kedik maral tikik ari sedekah sajadah
I kerlang i santir lekat semiyang jemat ko ku emah
Idenang rapat-rapat mengé naséhat ari khutebah sajadah
Bujurmu ku kibelat mampat kao i érah
Guncang nawah komit kumat nge mukarat bilang tesabah sajadah
Setun muroan bergembira a reraya ko kuemah
Berkémek bénné rata jeb jema mah sajadah, sajadah
Pembangunen penting dana ngutip derma ton sedekah
Kesemiyang kin musalla lo biasa enti leléngkah sajadah
Sajadah o sajadah kumai ko mersah
Sajadah o sajadah kumai beribadah [SY]
