[Sastra Gayo]
Win Gemade
Kudah kemali ling gerieten
enti mubésik kusi kiri-kuen
enti ibetih mpurah urum tuen
mesom-mesom osop gere besinen
Gere mehat ara simungune
“kusi malé die”
kin pemampat ni basa pemanis ni rupe
“eleh..malé ku mersah sejep”
ling lagu besisu gere mulentayon
Wo begen!
ike soboh mera rami kin sinon
turah munampi giliren ara sesuk ara si bekelkup
ara si tegersah ara sibeberakah
Wo begen!
mejen nge muserempuk urum kil urum tuen
mejen nge berulen-ulenen
keta ike ara siberet mata
mesom-mesom osop neten kekiren
Wo begen!
bermacam bagé corakké
begen mersah
beriring déba pintu beperngah
mejen nge pecelangah
tenaringni kekanak sedang
gere manut wihé kurang
gere mehat mien tenaringni bebujang ukang
keti re aténte nge salah panang
Wo begen!
sisingah gere munéngon jabaten
ho guru ho ke tengku sike kerani sike manteri
ike nge itiro tubuh osop bep osop ko sepuh
Ara begen arul
genap atu kin tetinyelen
manut imai wih lalu ari uken
kekire turah terang
mata juah pupepanang
gere mehat liwet jema ngenal kelowang
Ara mien begen wih kuI
Itos tétéwé ari batangni setur
isupui unang-unang jamur
reréngé deba murompong ipangan lao
seba bepelastik cir itotohni gegebe
lagu siterih kite
tete gere sige
teku seger terem dabuh mutabu
ike ara simunampi mera kin keber lang kusui ho
Wo begen!
begen!
ara begen simoderen
gere kite demu ikalani toweren
beminyak wangi be atu porselen
mukilet unang-unang ton penomenen
kedang deba nge arape iumahni pemen atau tuen
ara begen sitos jepang
gere hék cingkung uku betupang
kunul jeroh kédéng bejunté
unang-unang mubual i gerdu simpang
nguk sesire mubaca buku mata gere juah pupepanang
Wo begen
gere ikaleipé turah isinon
ike tuke tengah gere ruh mera mulimen
Wo begen gere bepemangopé lagu siungeren
ike nge hejet tenironni beden
gere pas itehen gere nguk ikemasen
wo…. .begen!!!
Takengen, 2015
Win Gemade. Peminat dan penikmat sastra, pernah bergabung dengan Sanggar Cempala Karya Banda Aceh serta sejumlah organisasi seni-sastra di Takengon. Dengan nama pena Win Gemade, Mustafa saat ini berprofei sebagai tenaga pendidik di Madrasah Aliyah Negeri (MAN) No.1 Takengon. Puisi di atas dibacakan pada hari Kamis 24 Maret 2016 di Dermaga Hotel Renggali Ujung Baro, dalam acara Refleksi Seni Untuk Danau Lut Tawar. Dalam acara tersebut juga turut tampil LK Ara, Sulaiman Juned, Zuliana Ibrahim, Al Huda Teater Reje Linge, Teuku Afifuddin, Wig More Rasyidin, Ansar Salihin, T. Afifuddin, Rasnady Nasry dan lain-lain [SY]
