Catatan : Win Wan Nur
Rabu 9 Maret 2016 siliwet, menurut para ahli astronomi terjadi “Gerhana Matahari”. Ini fenomena alam si terjadi berulang tiep sekian puluh tun. Jadi ari jemen mi nge betih jema ara fenomena ini. I Gayo, tetue jemen pe nge penah mungalami ini. Wan basa Gayo, fenomena Gerhana ni istilahe, Telan Rau.
Besilo, dele kite generasi Gayo si seni si gere paham. Sana ke artie ‘Telan Rau’ ni. Kune sejarah e istilah oya.
Aku pe jemen gere kubetih, tapi bewene muke setelah aku taring i Bali. Kupen istilah Telan Rauni pe ara i Bali ken munyebut peristiwa alam Gerhana, dis lagu i Gayo.
Bedae, isien lepas ilen kite telusuri ari si asal usul geh ni istilahni. Lagu Ume si i Bali pe iperin jema Ume, kupen asal e ari geral ni Dewi UMA, adik banan ni SYIWA si merupakan “dewi pelindung sawah” kene urang Bali.
Betan sen urum Rau ni, lepas kite telusuri kisah den cerite e wan legenda Hindu.
Jadi Rau ni cerite e gergasi (basa kite Gurugaji) si jatuh cinta ken Dewi Ratih (Dewi Bulan). Renye we munyamar ken Dewa, tapi penyamaren e ibetih Dewa Surya (Dewa Matanlo), renye iseder ne ku Wisnu.
“Sana ini Wisnu, so Gurugaji nge munyamar ken Dewa, Ratih so kenake male ipera’el e”, beta kedah cerak ni Surya ku Wisnu.
Renye mumenge penyederen ni Surya, cerite e idedik Wisnunye renye Rau, Gurugaji si munyamar mujadi Dewa ne. Karena betihe gere mungkin menang mulewen Wisnu, wan tengah idedik Wisnu ni, inum ni Rau ni ‘Tirta Amerta’ si ike i inum sah pe murip e renye abadi, gere mera mate ne, Dewa pe gere lepas ne mununuh ne. Tapi, tengah male i enum e ilen wih a, Wisnu si mudedik nik Garuda atau Gerde basa kite e, nge pe sawah. I erah Rau ne Wisnu nge sawah, renye tir-tir inumne wih Amerta ne. Wisnu pe gere mera kalah tir, i sang ne renye pedang e ku rongok ni Rau….Tus. Kupen Wih si inum e ne teku sawah ingen rongok e ilen.
Seni Rau, Gergasi si munyamar mujadi Dewa ne nge mupisah beden urum ulu. Beden e mate, tapi ulue si nge muninum Wih Amerta ne, nge pe abadi gere mera mate ne.
Ulu si tus ingen rongok ni le si karena dendam renye dor mudededik Surya urum Ratih, male ipangane. Ratih rum Surya ni pe musangka i atei e kati enti kona pangan. Tapi men pe pipet e Ratih rum Surya musangka, seseger kona we pakea i dedik Rau ni. Beta kona pe, oya le langsung i pangan Rau a renya Ratih atau Surya ni.
Waktu ipangane a le terjadi Gerhana. Ike si kona pangan Ratih, keta terjadi gerhana bulan. Ike si kona Surya keta si terjadi Gerhana Matahari.
Tapi karena Rau gere mu beden ne, meh itelane, Surya atau Ratih ni gere mayo ku wan tuke, tapi tangkuh mien tar rongok e. Oya kati gerhana ni gere permanen. Meh gelep karena Ratih atau Surya ara wan awah ni Rau, denie terang mien waktu Ratih atau Surya tangkuh tar rongok e si itus ni Wisnu.[]
