Oleh : Ibnu Hajar Lut Tawar*
Kusa-Kusa
Lemem bertona le pantas beruló
besiló le gere né ara
tertip bermenjelis umet bermelie
besilo gere né gunei jema
Santan lemak manisen lungi
besilo ni nge méh pana
ike cerak gere mu kemali
ike berperi luer biasa
Tép óróm oném didong jemen
kin pesenen uken urum toa
kelem ni enge kite éngon
besiukunen si gere ara
Nge kite éngon jemen besiloni
sintak ni nyanyi enge mu gempa
lagu Gayo-ni si paling asli
ike i teliti memang jaya
Kune keta kunehmi die
seni Gayo nge taring rongka
kusahan mi aku mungune
ceh tue gere né ara
Gere né ara le tempat bercerite
nge mulo tetue bangka
didong ni jema didong ni kite
lalé munuke kekemél ni jema
Mórip kanung edet maté i kanung bumi
edet Gayo ni gelah muperala
ike edet turah i kuweti
nge terdiri urum agama
Asal ike edet imasa sedenge
beru berine bujang berama
sé edet kengon gere bergune
nge berconto ku embah Jawa
Belang terpancang nahma teraku
nong maténgku kerna oya
nge ku pantiken naku genuku
bier mu keru aku nge réla
Asal ike edet gere bergune
kemél te gere né ara
delé pedi géh budaya ku Gayo
jege-jege kite rata-rata
Nge mupinah besilo peraturennge
kite éngon terang nyata
nge rata umah lagu isesiyen
tutur tuen munalu papa
Wo kuneh mi keta urang Gayo
tutur Ine italu mama
nge méh musier manat ni datunte
nge mamo sara donya
Keta kusi rawan mu nalu abang
wo Wijaya ara ke i toa
ike kucing dekat ku penangang
rélo i belang turah ku belanga
[SY]
