oleh : Amalah Ari Kenawat
Sara peden tumung si tuju
Woo Ama si malé maju wan pemilu
Gelahmi kite bersitunungen
Kena nge ara si munetah tentu
Kati kite Gayo ni nguk bersatu
Ikepé turah gelah urum cara alus Ama munelak
Kati mah tuah gading siretak
Kéngon Ama lagu gere oloktu begalak
I tetah ku jeroh Ama gere dalih mumotihni salak
Enti idedatén Gayo ni muretak
Sikut ku kiri ku kuen pé minipak
Entimi ke dalih Gayo ni mutetah
Sayang so kekanak budak generasinte puren
Kami betih Ama pé maju
Nge sigep Ama urum baju ayu
Enti kenaké entap ni tikik kite mutabu
Akhéré kite Gayo ni méh mukaram sara perau
Kenak né gelah kite sara peden
Sara-sara jemante turah kite kunulen
Enti ara bur paluh toa urum uken
Kati genap pakat ari Gayo sara jelen
Kenakné enti entap ni ambisi
Méh kite dawa dawi bala bili
Gelah bewéné kite betawar bengi
Kena puren kasé Gayo ni we si rugi
Ike béwéné berkenak kunul
Selo mungkin lulus kite jujel wan sara perau
Kebetapé gere mukunah kite mubeda baju
Tapé tekad den niette tetap kin Gayo maju
Buge jeroh mi kite bersiturin
Kati yakin biak sudere
Enti né ara gajah kule polan polin
Pada akhéré kite kin penengkip ni aré
Ini ku mohon ku Ama Tengku
Buge ku arap enti né berseteru
Gelah kite peden sinemah ulu
Enti i pengén si nemah sisu jalu
Gelah kite berpikir cerdik
Enti ara kekire akal si licik
Buge kite santun wan cara berpelitik
Enti turah sabi diri kite ungak-angik
Takengon, Maret 2014
_
Amalah Ari Kenawat – lahir dan dibesarkan di kampung Kenawat Lut Takengon – pernah menempuh pendidikan di SD Negeri 1 Takengon dan SMP Negeri 1 Takengon lalu menamatkan SMA di Medan Sumatera Utara. Pernah kuliah di Akademi Komputer Widyaloka Jakarta – menulis syair dalam bahasa Gayo untuk mengkritisi kesenjangan sosial yang terjadi di masyarakat Gayo saat ada sekitar seribuan syair Gayo yang dimiliki semua bertema masalah Gayo.
