Silga Nosra
Perau
Perau,
Ari uten rime niko asalmu
Galang rimes rum gergaji penukemu
Gere lupen paci kin pengurukmu
Buge belangi bang kase bentukmu
Perau,
Niko naru bentukmu
Lemus olok bedenmu
Gere ara robok wan tukemu
Buge jeroh bang kase beluhmu
Perau,
I atanni lauten ko munuju
Sabe nenang wan gelumang pitu
Ike laut tenang galak atemu
Karna gere mempas gelumang ku bedenmu
Perau,
Urum luge kao sejudu
Laut lues pendiangmu
Kuyu bade niko lewenmu
Genereng ni pante tempatmu musilu
Perau,
Ike nge tue sayang nasepmu
Gere olok ninget ken budi jasamu
Wan ni karang musermemu
Recak kucak-kucak ken pong muniru
2 Desember 2013
Ues
Ken kenangen si nge munge
Munarengen luke i dede
Wan ni nome gintes gerle
Rupen besilo nge tareng cerite
Gere ku nanten ken uah ko bunge
Si kerna tuhi serlah wan lao senye
Wan pikiren terbayang rupe
Ku jangen lagu ku denang cerite
Ken beluhmu, engi
Gere neh ku talui
Ken teduhmu, engi
Gere neh ku singahi
Kerna nge osop kalam rom janyi
Rike ni pena gere mu arti
Wan ni awah mulemak lungi
Rupen ni ate munasoh rui
Selalumu mi manut kao ku toa
Masa i uken cerite lama
Besilo seni ku kirim do’a
Jarak bele selisih mara
29 November 2013
Silga Nosra lahir pada tanggal 20 Februari 1989, alumni Gajah Putih Fakultas Pertanian Jurusan AgroTeknologi. Saat ini tinggal di Kampung Nosar Kecamatan Bintang Aceh Tengah. [SY]
