Yumna Syahirah
Mubiner mata ni lao i kendiring ni Bur Télong, hawaé si sejuk tersa bengi i beden, beluh ni emun bengi nirasaé lagu gere biasa seumpanma es aru Kutub Utara.Wan perjelenen delé jelen si muliku-liku.
Sampé-sampé Syakira pé pening urum sakit ulu, iéngon Syakira di batang nin uyem ikendering ni jelen. Syakira gere seber sawah ku negeri isalupi emun “Bener Meriah si beribu kota Simpang Tige Redelong.”
“Nge sawah ku Bener Meriah”, Syakira mu ngernyét ni mata.
“Syakira! Éngon so Bur Ni Télong, kite nge sawah ku negeri isalupi emon!”. Kené ama sesire munuruhni Bur Cempege si nge pesesuk atas.
“Ino… belangié pemandangené ama,” Syakira te nga-ngah.
“Ama, isi ke negeri isalupi emon”?, Syakira mungune kebingungen. Amapé kedik mengé pengunen ni Syakira. ”Kasé betih ko we”, kené Ama.
Gere keras sangka ni motor, kami pé sawah ku sara kampunng, igapura bertulis Kampung Gegerung Kecamatan Wih Pesam, Kabupaten Bener Meriah.
Umah pemukimen rakyat beriring jeroh bersusun, teridah bunge envil sitengah mekar ipeger ni alam-alamen ni umah. Teduh ni amangku motor arap ni umah si bercat biru, isamping niumaha ara lapangan bal volley.
Peger ari kayu jati berwana coklat si muhiesi umah, uamahapé teridah belangi. Syakira munéngon ku kuen ku kiri isekeliling umaha. Selama i Bener Merah kami taring iumahni.
Syahira mayo kowan umah nge kegalaken. Iwan umaha delé pajangen-pajangen zemen. Macam berbagé motif ni kerawang si terpampang i rering ni umaha.
Hawa soboh si sejuk i Bener Meriah, Syakira munuwet ni jeketé. Emun muloi turun mungeliling tuyuhni kupi Arabika. Syakira mulangkah ni keding mungelilingi umah, Syakira munéngon beberu sedang si sara umur urum wé tengah kunul i atas ni bangku, bermata bulet, berlesung pipi.
“Hey.. kenalen gerelku Syakira.” Syakira munyeraki beberua.
“Hey, aku Ina”
Beberua mujurah ni pumu, pakéa bersalamen.
“Kam tengah ngune?”. Selidik ni Syakira waktu munérah Ina nemah roa kerapé urum parang.
“Aku tengah munyiepni peralat ku empus, seni tengah musim tasak kupi.” Kené Ina sesire mugenéng ni kerapé ku kerlangé.
“Empus?”, Syakira ngune mien.
“O.” Ina munanguk ni ulu, wé mu nyeluk bulang urum sepatu lenge.” Kam merake beloh ngutip atau gere?”, kunei Ina miyenné.
“Sanake ngutip kupi?”, Syakira mungune penasaren. Syakira beluh mununung langkah ni Ina mari besinen ku ama orom ine é.
Empus ni Ina gere gip ari umahé. I perjelenen mȯrip batang-batang kupi arabika si nge beriring, batang-batang peté mȯrip subur samping ni kupi, batang peté sengeje i suen kin pelogoh ni kupi ari porak ni lao.
Kami remalan urum semangat ku empus. Bau ni uyem mu campur urum udara si bengi i soboh lao. Wan perjelenen Syakira munyelesei ulung-ulung si ijo sigere penah i éngoné. Béwéné petani kupi tengah mungutip kupi, bentuk ni uwahé jorok-jorok. Kupi si nge enguk i kutip warna ni uwahé ilang olok. Uwah ni kupi gere nguk ikutip urum tetampukké. Kerna tampuk ni kupi a mujadi kin bakal ni uwahé mien.
“Ina… éngon… uwahé nge méh ilang, inike uwah ni kupi si perin kam ne?” kune i Syakira nge gegalaken. Ó… oyale maksudté. Kam Syahira kutip si warna ilangé dih boh ?, méh oya ayonen ku kerapé si i rongokma.”Kené Ina. Sesire mu nuruh ku kerapé si ikerlang ni Syakira. Nge gegalakken Syakira pé mumuloi pengalaman pertama é mu ngutip kupi.
I ujung so Syakira mu néngon jamur kucak ari papan, ara alas bedenang macam berbagé warnaé. Syakira musangka ku arah ni jamur iyobunné barang-barangé kuwan jamur a. Batang kupi murip beriring teratur, batangé renah murah i jangko Syakira urum Ina. Batang kupi si renah jenisé aténg. Ara mien jenis kupi si lanyo batangé, uwahé kul ulungé kolak, kupi ini geralé kupi tim-tim.
“Ini bangkue…“, kené Ina i osan e bangku kayu.
“Kin hana bangku ni Ina?, kené Syahira kebingungen.
“Kin ngutip kupi si atas batange, kati enti pelelumpet kam mungutip kupi a.” Kené Ina sire mu nuruh ni batang kupi si lanyo.Uwet ni Syakira bangkua i obone ku samping ni batang kupi.
Wé muloi mungutip sesara uwah ni kupi, Syahira teduh sekejep.
“Mukune Syakira?, Kené Ina kebingungen.”
“Ina… bedenku gatal-gatal jing”, kené Syakira sire mu garut-garut bedené. Néngon kejadin oya pakati Ina Syakira teduh ku jamur ton pakéa noboh barang-barang sine. Iperhatin Ina sana si nge terjadi ku Syakira, rupen Syakirah kona sesongot, yoh siara ibatang ni kupi.
“Syakira .. kam kona sesongot yok ni kupi.” Sire norohni beden Syakira si nge muloi ilang-ilang.
“Ina kune ini ?, mera ke entap ni yok ni Syakira sakit? Kune ini Ina …tolong”, Syakira kesakiten.
“Tenang dih Syakira.” Kené Ina sire murai uwak.
Syakira munangak ni ulu, iwetné pisang goreng si beli ibu ni Ina. Rupen hawa si bengi mera nos tuke mulape. Gere lemem ari oné engih merané Ina nemah ulung bermacam bagé. Iurum né bééné ulung-ulung nya puyuné urum pumué. Gere mokot, iramulné ulung-ulung a. Isapunné ku beden ni Syakira si nge kemung-kemung.
“Berijin Ina,” Kené Syakira. Wé merasa gatal-gatal i bedenné nge mukurang.
“Murum-murum.” Kené Ina kegalakken.
Mata lao muloi nik. Cico ni manuk nge bersisauten ari batang ni kupi. Paké a muloi mien mungutip kupi. Cumen seni pakéa nebah ku batang kupi si renah-renah. Syakira kegalaken kerna ini pengalamen né pemulo mungutip kupi i Bener Meriah. [SY]
Selesé
* Yumna Syahirah, sekulah i SMPN 1 Wih Pesam, Bener Meriah. Lahir tanggal 16 Juni 2012.
