[Puisi Bahasa Gayo] Enti Renye Beta
Hasrin Z Bersah
Subah mutanuk renye kusi kenak i cangkil
Olokdi senang ike ara si mupengkil
Kuso pekincel kuini pukekedil
Ku taon tekil galakdi rasaé
Teku mutaji renye galip pusesabung
Baro beluah ari taon bekurung
Kemangen kepek isi mukerumung
Pupeperah kuntung kin pakané
Ben ilen mukukut renye sabe mugarut
Kedik mugagak nengon kulit muserlut
Jebok rodok mumerahi sunut
Gere jenta pusesungut arap jema delé
Konot len sawét renye gere tetuho satak
Pora i edang sunguh munantak
Gere n mubetih matah orom tasak
Meradi pusesepak ike kurang pakané
Tikik ilen nemah renye turuhen behu
Muserempuk i dene tipak dagu
Kiser balik tekala mudemu
Pugegining ulu ulah tengah segé
Sekejep ilen becerak renye kolak awah
Sintak sedengak laing kekuwah
Sanahpe buet gere amanah
Mubeda si osah orom si sawahné [SY]
Biren, 3Agustus 2025
