Oleh : Syifa Salsabilla*
Ara sara cerite wan masa oya kupi si mu uah emas. Ara anak kelas tige SD si mugeral Onot terlahir ari keluarga si gere mampu. Kedue jema tue é buet é man ongkosen i empus jema. Jadi Onot gati taring urum anan si nge tue.
Murip pé si nyanya, jajan pé ngih ara. Enti mulo jajan kin mangan jeplo pé nyanya, mejen sén né genap-genap kin mubeli oros. Gati mangan bubur kerna oros pé tikik, jadi oros oya i jerang sawah mujadi bubur. Lagu oya murip onot ni urum anan né urum kedue jema tue é.
Wan sara ketike Onot ni beluh urum jema tue é ku empos jema ton pakéa mungenal rejeki urum mu uweten sén ari mangan ongkosen. Lagu biasa pakéa ulak iyo sekiteren jem 17.00-18.00 Wib.
Ama urum ine urum Onot ni nge mulapé kerna si empu empus mujule jengo ruhul sekiteren jem due ruhul. Pakéa munemah bekal ruhul ku empus bubur we si ara é. Oya pé bis-bis kin roa jema, oya pé i pangan urum tulu jema.
I kune Onot ni urum anan é.” Anan ara ke gulé urum jantar kin ama urum ine paké a nge mulapé, le Nan. Kami ben we ulak ari empus.”
Anan ne pé mujeweb, “Nge ulak ke keta kam ari empus?”
Onot ni pé mu sut, “nge nan.”
Renye i perin urum anan né, “Ara jantar urum gulé i atan bebaka. Sine anan jerang jantar taruk jepang urum gulé masin goréng. Uweten kuso, mangan renye, kahé mayo kuyu.”
“Boh nan. Berijin. Ku perin mulo ku ama urum ine. Kati pakéa mangan.”
Onot ni pé mu talu ama é urum ine é si tengah mubersehi kerpé si lekat i wan seruel é si paké a sok ken.
Onot ni i perin né pesan ari anan ne. “Ama urum ine i perin anan mangan renye kite, ara i bebaka jantar urum gulé.”
Ineé mu sut, “Boh mi nak ku, kite bersihen mulo beden kahé gatal kin urusen. Bier pé tuke te mulapé, kite bersihen mulo beden mari oya kite nikmati rejeki Allah melalui pemanganen si kite pangan. Insyaallah si mayo wan tubuh te berkah.”
Singket cerite wan beberapa menit, terpengé ling ine Onot ni bercerak. “Onot talu pé ama urum anan, kite mangan murum-murum. Si ijerang anan ni sedep pedéh ini. Kahé méh i pangan urum ine.”
“Boh ine,” jeweb ni Onot si mu semangat.
“Ine hana si nguk ku bantu?”. I kune i Onot sesire munoboh wih basuh ku cambung.
“Nge genap wih basoh hé oya. Onot nge munge béwéné. Entah kite semiyang magrib, nge waktu é semiang magrib. Oya éngon Anan nge munangkap wih semiang urum ama nge mudenang semala.”
Nge munge semiyang paké a kunul i alas sesire mu mumangan kelam si sederhana. Gere lupe kedue jema tue ni Onot ni mengucep Allhamdulillah. Nge mari paké a mangan paké a pe muniru kati pesam beden. Paké a becerite tetang hana si paké a lalu i si i empus ne.
“Ngih cocok hana si kam bueten sine ruhul. Munemah Onot ku empus, bontot pé ngih genap, kune oya? Untung pé ngih sanah sanah wé urum kam. Enti berharap jengo ari jema. Kedang pé paké a ara hali kin mujule jengo kin kam. Kati lagu oya berharap ku Allah.”
Anan né munyeder nasehat kin anaké urum kumpué, peménné.
“Boh mi bu, maaf pen kami. Ibu ari sihen ibu demu oros kin kite mangan sine?” Ikune i ine ni Onot ni urum até penasaren.
“Anakku oya ne ibu mujuel kupi lélésen ku toké kupi si géh ku umah te. Kati nguk ibu munosah kam kero putih urum gulé kin kam. Ibu nge ibu duge kam ulak ari empus pasti nge mulapé. Kati lagu oya ibu mujerang kin kam terutama kin Onot.”
Jeweb anan urum wih mata mubasahi pipi.
“Ibu berijin, ibu nge mujaga aku ari kucak sawah aku mpu anak. Maaf pen aku ike kami gere ilen nguk membahagie ibu.” Mu sut ine ni Onot urum mu ulik ine kandung é.
“Bagi ibu ini nge lebih ari kata cukup. Ibu nge bahagie urum kam. Ini we rejeki Allah kin kite. Enti merké bebuet, mari oya bebuet urum halal. Ike rejeki nguk sekali mangan. Berusaha renye kati rejeki pé berkah, delé pé rejeki ike ngih berkah kin hana malé?”
***
Azan pé nge meling ari mersah dekat ari jarak umah paké a. Ine urum anan semiyang berjamaah i umah. Onot ni beluh urum ama é ku mersah paké a berjamaah. Méh oya paké a pe mangan soboh urum kero goréng si i jerang urum ine ni Onot.
Méh oya paké a munemah bontot kin mangan ruhul, pakéa besinen urum anan kin beluh ku empus. Pemanangen si belangi. Munucep Onot ni wan até wé.
“Rabbi, berijin kin rahmat urum karunia mu i wan daérah kami ni urum buge mudah rejeki ni kami”
Mata ni Onot ni ngih sengeje mu négon kupi si gere pernah i éngoné. Wé mu nengon ari jarak dekat kupi si berkilau oya.
“Uah kupi si mu uah emas? Mimpi ke aku ni geh?” I perin Onot urum ngih percaya wé urum kupi si i arap mataé.
Orom wé munucep basmallah Onot pé mukutip kupi si mu jah emas si ara wan batang kupi i arap pe. Meh oya we mungenal kedue jema tue é si nge istrahat, wé munosah si muwarna emas ne ku ama urum ine é.
“Ama urum ine cube éngon kupi ni hana kati muuah emas?”
“Enti macam-macam ko anakku? Kite nguk miskin tapi enti kite berhayal nak.”
“Uah ni kupi ngih ara muwarna emas, béwéné muwarna ilang.”
“Ini le ama, éngon mulo.” Ucep Onot ku jema tue é.
Ama urum ine munéngon kupi si muwarna emas oya. Setan i éngon ama é Onot ni gintes ama é munéngon kupi si i kutip urum Onot.
“Ngih ara ilen ama éngon kupi si muah emas seumur mȯrep ku. Ini fenomena alam atau hana geh. Ilmu ama mubatas anakku. Kadang ko cat kupi ni ngih ke?”.
“Kune cara é munecét né ama, ari sihen aku mumah cét urum kuas? Ama ke betih keadaan kite lagu hana, mustahil aku munemah cét.”
“Betul hana si i perin orom Onot,” ucep ine si ilen galak ni até mu néngon kupi si muwarna emas oya ne.
“Ike lagu oya, ntah kite ulak. Kite kune i urum anan.” I perin urum ama Onot urum munaso kupi si muwarna emas ne.
Ama Onot ni munatang kupi i ulu é. We munemah kupi ku arah empus. Kupi kupi ini i suket urum tém si ukuren sepuluh aré.
Ara onom tém kupi rejeki paké a lo ni i empus paké a. Gere lemem toké kupi pé géh.
“Sidah tém kupi ni?” I kune i urum toké kupi ne.
Ama Onot pé mujeweb, “Onom tém pong.
Kupi paké a pe nge i juel nge muganti urum sén. Pake a remalan ulak, kin sawah ku umah paké a butuh waktu sekiteren 15 menit. Nge pertengah ni jelen ama Onot si remalan i paling kuduk oya pumu é i amat jema.
“Enti lagu oya, metuh aku.”
Méh oya mesut jema wa si munamat pumu ni ama Onot ni. “Masa oya pé gintes sampé malé metuh.”
Ama Onot gintes, i kire é ine ni Onot atau jin si munamat pumu é. Rupe e si munamat pumu oya le ama ucak Onot oya le adik é.
“Eleh rupen adikku. Ari sihen urum malé kusi? Teduh mulo i umah!” Jeweb ama Onot urum tenang.
“Aku ari empus, bang. Aku beluh mulo boh. Kahé aku singah, bang.” Jeweb adiké.
***
Nge sawah ku umah paké a bersih-bersih renye semiyang ashar berjamaah i umah. Mari oya paké a teduh. Renye paké a kumpul i ruang keluarga. Anan ni Onot ni pé nge i lah keluarga kucak ni. Ine ni Onot bercerite asal muasal kupi si muwarna emas si i depet Onot sine.
“Ini asli ke, bu?”
“Ini ke empus ari warisen ibu, pernah ke ara kupi si mu uah emas?”
“Hana si nguk kite bueten urum kupi sara anak ni, bu?”
Delé ni pengunen si i kune i ama urum ine ni Onot ku jema tue paké a.
“Ngih pernah terjadi lagu ini, si ara hasil ni kupi i beli mujadi emas. Ini anugrah si i osah Allah ku Onot. Kin bukti kupi si sara butir ni betul ke muwarna emas atau gere pé. Kite gere nguk perin ini ku jema lén. Ibu ngéh mera terjadi ntah sesanah si ngéh kite tiro.”
Mari oya, beloh jema tue ni Onot ni ku tukang emas si dekat ari umah paké a. Untung pé toko emas gere ilen tutup.
“Pak, cube éngon ini. Sidah gram?” Kune i ama ni Onot ni ku tukang emas urum munosah kupi si muwarna emas.
Belangi pedéh, ngih ara ilen ku éngon emas murni si berat té sepuluh gram.
Lo ni emas sara juta pergram. Bersedie ke emas ni malé i juel? Regeé sepuluh juta rupie. Kune?”
Kunei tukang emas oya.
Ama ni Onot pé gintes. Orom munucep Alhamdulillah paké a pé muiklhas kupi ne i juel. Kedue jema tue Onot ni nge sawah i umah. Paké a munyeder hasil ni kupi ni si i juel. Anan ni Onot munasehat ku anak, kile é urum kumpu é.
“Allhamdullilah rejeki ni Allah urum jelen si gere kite sangka. Oya le kite turah bersyukur urum bersedekah. Sedekah ku jema si kurang mampu urum ku mesjid. Sisa é beli pe kin keperluen Onot.
Rejeki ni kin Onot enti i anggap énténg. Beli renye oros urum sembako. Kati kahé musim ngih ara kupi kite nge kekurangen kin mangan urum sén. Gelah rajin bebuet urum mungemas sén kati mȯrip te gere nyaya.”
“Boh mi bu.” Jeweb ine urum ama ni Onot urum segerak. Renye tibe-tibe ara jema si munetok pintu. Ama ni Onot munuke pintu. Wé munyambut jamu urum bahagie.
“Mayo dik ku, urum sahen ko géh?”
“Assalamualaikum” ucep ama ucak Onot mari i jeweb salam wé renye munyalam mi pumu ni anan urum ine Onot.
Onot renye kunul i penumpéten ama ucak. Pakéa nge denem, delé pedéh cerite é Onot ni ku ama ucak é wé becerite pong-pong nge i umah sekulah. Onot ngih i cerite é si kupi emas ne.
“Abang urum kakak, ibu, aku géh malé muniro bantuen. Isteri ku malé malang, sén ku ngih genap kerna malé i operasi i Umah Sakit Azalia, Simpang Tige.
Sebenar é kemél aku muniro ku abang urum aka, ibu. Kam sudereku kadang ara sén atau ara jelen kin aku kati ara sén tulu jute.” I peren ama ucak Onot urum wih mata mubasahi pipi.
“Enti mulo boh”, i kuseder mulo ku ine ni Onot.
Ngih lemem géh ine ni Onot urum munemah sén si i tiro urum adik ipar. “Ini gune urum jeroh. Isi séni isteri mu? Kati géh kami kuso.”
“Berijin kakak abang urum ibu. Séni inen mayak ara i Umah Sakit Azalia, Simpang Tige. Orom sén ni nguk i operasi kelam ni. Sine ulak ari empus malé kini aku, demu i jelen lagu gere pis aténgku munyeder urum abang.” I perin ama ucak ni Onot. [SY]
Takéngon, Oktober 2024
*Penulis bergerel Syifa Salsabilla, lahir i Takéngen tanggal 9 Maret 2011 sebagé anak keopat ari pasangen Daola Nasri rum Rusmanita Frianti. Bercita-cita mujadi sastrawan. Hobié menulis, mubaca, muhafal. Syifa belejar delé hal ari sedereé. Séni, Syifa sekulah di SMP Negeri 1 Bandar.