Oleh Vanesya Uleniate*
I Kampung Reronga tepaté i SD Negeri 2 Ronga-Ronga malé munaraen studi tour ku tugu Rime Raya. Sebelum kami berangkat, kami turah mengumpulen biaya kin perjelenen sejumlah seratus ribu.
Tapi, seni aku bingung karna ledi si suen ama gere mujadi akibet cuaca i daerahku gere munentu. Mejen porak, mejen uren. Apalagi mejen éngéh serlah si munyebapen senuen ama gere mujadi lede pé méh mu keriting.
Sementara, modal pé enge delé pedi méh kin senuen né bahkan téba berutang ilen ku toké.
Aka si sulu bere tengah kuliah semester akhir. Delé pedéh sén i butuhen aka ku ni sehingge belenye ku dapur pé gati gere genap oya le alasen né kati tereh aku munyawahen né ku ama terkait studi tour si i aranen i sekulah. Aku pé pebening sesire berpikir i arap umah.
“Kumpuku hanati bening pedi?”, pengunenan ananku aku. I érah Anan aku pebening.
“Hana si i pikir ko kumpuku?” kune anan mien. Gintes aku kerna anan tibe-tibe ngéh ku aku dan akupé sadar ari lamunen ku. “Anan ni woy gintes kite obohé” ku perin ku anan sesire ku olékken Ananku.
“Hana pikir ko kumpu ku?”, kéné anan mien.
“Anu leh nan, aku malé beloh ku Tugu Rime Raya sekulahku munaranen studi tour koné.
“Nye hanati ko pebening? Ke jeroh beloh lagu noya depet ilmu.”Kené anan mienné.
“Ama tengah gere mesén. Aka pé gati munenah belenye kin kuliahé.” Laoh mata ku mujaril ku dagu.
“Adoh, oya ke si pikiri ko kumpu ku. Lang entah ta kite ngutip kupi i empus ni anan. Kutip nye kendiri kurangé kase anan namahé.”Kené anan.
“Berijin nan boh. Galak pedi atéku megéné nan”, jewebku sesire ku oléken anan.
Lang é ya seulak sekulah, aku beloh ku empus urum anan mu ngutip kupi.
Cuaca si porak gere mematahen semangatku kin mengutip kupi. Aku ménét pedeh mengunjungi Tugu Pintu Rime Raya.
Lao pé nge male magrib nye i pakati anan aku ulak. Kupi si enge ku kutip ku julen ku ama ncu. Kebetulen ama ncu ku toké kupi.
Renye ama encu ku mubeli kupi ku lebih atas ari jema lén.
Senang naté gere terperin. Nye ku ucapen berijin ku ama encuku. Rupen, sén kupi si i osah ama encuku nge genap pé ken muneber sén studi tourku. Anan pé gere lupen munosah tamah kin jajanku.
Lang né ya, i julen ama aku ku sekulah. Jem 08:30 bus pé sawah ku elem-elemen sekulah. Kami pé bebaris rapi nye berangkat menuju Rime Raya.
I perjelenen bu Rica Mahbengi mujelasen tikik tentang sejarah ni Tugu Rime Raya. Eh, lupe aku mu merané buk Rica Mahbengi ni wé adalah guru mulok i sekulahku.
Bu Rica ni delé pedi mubetéhi tentang sejarah i daérah Gayo ni. I was ni bus aku kunul urum Sabrina. Gadis si belesung pipit ni oyale pong ari kucakku si setie sawah ku séni.
“Sabrina aku gere pas kunul i kuduk. Aku murah pening.” Kuperin ku Sabrina.
“Boh ta ike lagu noya, ntah kite kunul i dekat jendela dih”, i perin urum Sabrina ni.
Peserta si berangkat berjumlah 29 jema ari kelas 6. Béwéné sangat senang gembira. Jelen si munangkok gere mematahen semangat kami. Gere terasa, kami pé sawah ku lokasi ni Tugu Rime Raya.
Sawah ku halamen Tugu Rime Raya, kamipé renye turun ari bus. Aku pé turun ari bus nye ku bantu bu Rica mudenang alas. Kerna waktu pé nge ruhul, kami pé mangan. Nge mari mangan kami pé renye beluh munéngon-éngon Tugu Rime Raya.
Wan tengah remalan, kami muserempuk urum jema tue kire-kire umure nge 80 tun.
Rupen bapak ni termasuk perjuang petran si mubetih sejarah ni Redio Rime Raya ni.
Urum até senang, bapak ini munyeritenen ari awal tentang sejarah ni Tugu Rimba Raya ni. Kami mudepet informasi delé tentang Radio Rime Raya ni, Kami pé munyatat i wan selembar kertas.
Rupen, hanya Redio Rime raya ni radio si masih aktif pada saat penjajahan. Sehinge informasi kemerdekaan mulo terpengé ari radio ini. Tapi sebelum oya, semasa Agresi Militer Belene ke-II tun 1948, Belene munyebaren fitnah bahwa Indonesia ni bubar nye keberadaen Redio Rakyat Indonesia ni (RRI) i uwet alih urum Belene.
Saat béwéné alat komunikasi urum lokasi pemancar i hancuren dan i kuasai oleh Belene, Redio Rime Raya berhasil bertehen dan mujadi Redio Darurat penganti (RRI) oleh tentera Republik Indonesia divisi X Aceh i pimpin Kolonel Husin Yusuf.
Redio Rime Raya berperan penting wan i sejarah mupertehenen kemerdekaan i masa Agresi Militer Belene ke-II.
Redio ini si munyebaren ku penjuru denie bahwa Indonesia masih ilen ara, lengkap urum pemerintahen né. Lokasi ni Redio Rime Raya ni ar i Kampung Rime Raya, Kecamatan Pintu Rime Gayo, Kabupaten Bener Meriah, Provinsi Aceh.
Tugu Redio Rime Raya ni besilo mujadi salah satu destinasi wisata i Dataren Tinggi Tanoh Gayo. I lokasi oya i bangun tugu si mujulang atas, Tugu Perjuangan Redio Rime Raya ni i resminen Menteri Koperasi/ Kepala Badan Logistik, Bustanil Arifin pada 27 Oktober 1987.
Aku urum Sabrina olok takjub. Ternyata, i salah satu bagien tuyuh ni tugu ara tulisen si mujelasen peran Redio Rime Raya i masa perjuangen. Tulisen oya i muloi urum kelimet “Saat oya sangat kritis.” Rupen dele pedi sejarah penting i Gayo ni salah satué Tugu Rime Raya ni.
Gere terasa waktu pé nge mununjukan jem 15:30 kami pé merasa informasi si kami depet nge akurat. Kami pé muniro berijin nye niro ijin malé ulak.
Gere terasa, lao pe enge mujelang iyo. Semburat senye lao muloi terindah i ufuk timur. Studi tour kali ini adalah lawatan sejarah si sunguh bermanfaat. Rupen né, Tugu Rime Raya ni memiliki delé pedi cerite sejarah perjuangen bagi bangsa Indonesia. [SY]
Rime Raya, Oktober 2024
*Vanesya Ulenniate, penulis berasal ari SD Negeri 2 Ronga-Ronga. Tulisen pemuloé oyale Karya Wisata Ku Tugu Rime Raya ni. Lahir i Ronga-Ronga, 01 Desember 2012. Anak Sulubere ari ama Musliadi den ine Fatra Suryana. Vanesya Ulenniate hobié mén bal urum Bulu Tangkis. Bercita-cita mujadi Kowad. Warna item mujadi warna kesukaanné. Uah Matoa menjadi uang favoritté.
