Melly Ratisa
I Gayo Lues tepat é i Umah Sakit Muhammad Ali Kasim, nge osop harapen ni akékku, wé nge lagu malé nyerah nérah penawar kin jeger ni anenku. Tap nge delé dokter si mumerikse énen bahkan sawah kona uak i urum dukun hebat si terkenal.
Keluerge ku pé unang nge mosop arah é tap sakit ni enen a gere ara titik terang é. Ara dokter nyerakné behwe enen sakit tulang terjepit, lamung, den ginjal bocor.
Nge bagé macam uak si kami osah tapi gere ara efék é hanah pé. Géh lo ume tamah sehat, enen malah makin molok. Lagusi gere néh ara harapen sehat enen a.
I saat aku den keluergeku dang kunul i kursi si ara i arap ruangen ni enen a, tibe-tibe géh awan nye sé kené, “Kerna nge méh kite ketieren, den seluruh tenege ngek kite kederet en nérah uak ni ine mé ni, tapi gere ara perubahen é pora pé, lebih jeroh é enti néh kite paksa, kedang ini takdir ari Tuhen.”
Cerak ni Awan ku ama.
“Hana maksud ama? Gere néh mera ke ama bantu ine sehat? Malé datén kam ke ine a lagu noya?”. Jeweb ayah ku urum ling si agak keras.
Awan si malas pelolo pé langsung beluh ari oné. Aku néngon ama isapu é luh é si nge mébér pé gere tega den beluh aku ari oné ku taringen ama urum ine ku iyoné.
Mari oya beluh aku ku Taman Umah Sakit, kunul aku i tuyuh ni kayu silo luah ni payah entap jarang nomé, kunul aku i oné silo nengon batang ni kayu si ntéwah ku kuen kiri entap iyup ni kuyu den oya nosah ketenangan kin aku.
I saat jem nge mu arah ku setengah satu, aku pé beluh ruangen enen kati semiang, mari semiang ndekat aku ku enen si dang malang gere mu gigih i atas ni tilem, kunul aku i samping éya den ku kekusuk pumu é si makin kurus, nge lagu tulen kona balut urum kulit.
Gere kurasa mamur luh ku nge agu aih kul, sakit olok atéku ike néngon enen malang gere mugigih lagu ini.
Lang néya, sekitar jem 2 porak lo, tibe-tibe enen hejep bekesah. Nye tauk i ama ku dokter kati perikse é enen ku a. Nye géh dokter ne den langsung perikse é enen a. Selang hide menit kederet dokter a den cerak né enen nge ulak ku Tuhen.
“Enen benasa tap aku penah niro enen ayu ke? Den penah kenakku enen beluh ari mȯripku?” Pongot ku i was ni até.
“Sunguh takdir nge pisah né kite” cerakku i Gayo Lues tepat é i Kampung Godang, entap pada 17 Februari 2022 lo Kamis, enen nge beluh taring né aku. Sunguh sakit olok néngon enen malang urum beden teger gere mu nyawa, den i kelilingi urum jema-jema si mongot entap beluh é.
Saat-saat paling sakit oya le i saat aku pé urum nirin ni enen, ku raup en salak é si biese é segar bik nge keriput, tapi silo salak é nge pucet den sejuk.
Mari oya urum nan aku nyemiang né pé, bahkan aku beluh julen we ku tempat teduh pemarin é. Mongot wé nguk ku néngon enen koan kuburen, mari ini gere néh ara si nos kero sangle. Gere né ara si mungeni aku neten uwen. Gere né ara si mbengisi aku ike degil den gere né ara si nérah kutu ku bik gere ara pé kutuku.
Enen hejep olok nerime é behwe aku turah kona pisahen urum jema lagu enen. Nge ku cube ku iklasen tapi lupen ni enen gere setemas oya si hi bekas ni pumu é, nasehat é den cecor é mupeputer i uluku.
Sunguh denem olok aku kin jema si muuk ikal a, sihi ipen épéh gere neh engkip, nge ara si meté den si gelduk, beden é agak ucak den kulit si nge keriput, sara khas ari salak é oya le kuntut i lah-lah ni alis é.
Tiep lo ku jeleni mȯrip urum rasa denem ku enen, sehingge lo beganti lo, bulen pé beganti bulen, den taun beganti urum taun. Rupen nge roa taun beluh enen ku den gere né penah ulak.
Pas sara waktu aku dang kunul i taman, tibe-tibe ari si gaib ku éngon samar-samar salak ni enen ku dang mujem ku aku. Aku pé senang olok, mungkin dum denem é aku ku usahan ku jangko walau ku betih gere mungkin, tapi tetap remalan aku ku arah ni emun si dia lagi enenku sidang pejém ku aku.
Makin balap aku remalan silo petetauk lagu ini
“Enen… enen denem olok aku kin kam.” Taukku, mari oya mosop salak ni enena arih-arih mai emun a.
Tibe-tibe “Tin…tin…tin…”
Hampir aku kona tabrak entap aku si nge ara i lah ni pasar a, untung pé gere tabrak ni jema ne aku den rupen jema ne pongku, Ayu geral é.
“Hana éngoni ko i emun u sawah gere sadar ko, bahwa ko nge i lah ni pasar?” Kunei Ayu ku aku.
“Enen ku Yu, enenku oya ne mujem ku aku” jeweb ku senang.
“Ihi éngon ko enen mu?” Kunei Ayu ne nan.
“Oya, i emuno ku éngon Enen ku, Yu” jeweb ku.
“Ya Allah sadar, enenmu gere né ara wé nge benasa roa taun si lewat. Pengén ye ko nguk denem tapi enti sawah lagu ini ikhlas en enenmu a, sayang wé” cerak ni Ayu naru.
Aku si mengé oya peh lagu kona pepar ni pungi kerna aku sadar nge berharap lebih ku jema si nge ulak ku Tuhen.
“Enen, nyesal olok aku selama mȯrip kam lagusi gere butuh aku jema lagu kam den bepikir behwe kam jepdor ara i sampingku, tapi nyata é i saat nge beluh kam dabuh denem aku.
Aku baru sadar bahwa aku perlu jema lagu kam i mȯrip ku, hanati gere ari agin a, i saat mȯrip nan kam den keadaan sehat” sesal ku wasni até.
Mungkin ini geral é penyesalan ara i akhir, enenku nguk ku silo doan kam mi we, buge masuk kuwas ni surge den aku bakal ku cube berusaha muikhlasen beluh mé.
“Enen nyesal olok aku entap penah ku ceraken kenak ku ganti enen si gere cécor lagu enen, den silo cerak si penah ku anggap sepélé, cerak si agak ku gi penah terjadi rupen é betul-betul terjadi den sejak kejadien ini ku bun mehne ken pembelejeren kati ku inget gere nguk becerak tasesana, kerna cerak dis urum doa, den arihin ku arap bakal ku jege dor lisanku. [SY]
*Melly Ratisa, biese i talu Melly. Lahir pada tanggal 24 September 2010, di Kenyaran Tengah. Kunul i bangku kelas sembilen i SMP N 1 Blangkejeren. Ara hobi mubaca dan nulis den mucita-cita mujadi Dokter Psikologi.
