[Puisi Bahasa Gayo] Enti Sampè Nume
Hasrin Z Bersah
Oyapé nguk
Sikerna remalan gere penah tungkuk
Munemah dene gere mera museruk
Perupuhen gere penah salah seluk
Musara anguk i wani munetah
Oyapé cacak
Sikerna beperi gere mera sergak
Mera mumengè gati munyimak
Munentun buet orom cara bijak
Gere munulak tekala murintah
Oyapé jeroh
Sikerna rubu kin taon belongoh
Kin seserenen gere mera mudodoh
Peberasen gere mera soh
Gere mulekoh bierpé muluah
Oyapé sikep
Sikerna tubuh rembege olok tegep
Muniti lumpè gere kemep
Lepas kin suluh sekire gelep
Mujerilep sabè teridah
Oyapé ruh
Sikerna bebuet olokdi sunguh
Nge munge baro teduh
Munetah pembagin gere mera kiruh
Baur ku paluh merawe singah
Oyapé pas
Sikerna bibes mien pantas
Gere nyanya sabe temas
Tekala morom gere mupentas
Bewene lepas den amanah
Oyapé penting
Sikerna munamat amanah olok pedi king
Pane beberakah gere murah umping
Munuruhen bengis gere orom giging
Ikepe santing gere renye mungunah
Oyale keta
Sikerna nge teridah arap ni mata
Gelah selèsè i panang nyata
Kati gaéh temas gerené nyanya
Ketier usaha oya siturah [SY]
Takengen, Agustus 2024
