[Puisi Bahasa Gayo] Kelebihen Ulen Ramadhan
Salman Yoga S
شَهْرُ الصِّيامِ لَقَدْ عَلَوْتَ مُكَرَّمَا # وَغَدَوْتَ مِنْ بَيْنِ الشُّهُوْرِ مُعَظَّمَا
يَا صَائِمِى رَمَضَانَ هَذَا شَهْرُكُمْ # فِيْهِ اَبَاحَكُمُ الْمُــهَيْــمِنُ مَغْنَـــمَا
يَافَوْزَ مَنْ فِيْــهِ أطَاعَ اِلَهَــهُ # مُتَتـقَرِّبًا مُتَجَنِّباً مَاحَرَّما
فالوَيْلُ كُلَّ الوَيْلِ للعَصِى الَّذِى # فِى شَهْرِهِ أَكَلَ الحَرامَ وَأَجْرَمَا
Kelebihen ulen Ramadan wan saér berbahasa Arab
Ike itafsir simendi keberkahen
Ulen suci inenanti umet muslim
Melie melebihi ari ulen-ulen si lén
Bier sara tun mukukum
Gere terbanding urum ulen ini
Saér Arabni bertulis lagu ayat
Mepat huruf baris urum harkat
Ike kite baca demu pahala
Buge kin berkah arti urum terjemahen
Ialih bahasanen kadang mubeda pora
Beda tafsir beda den pemahamen
Maklum serinen tengah wan belejer
Kebetapé cube kubaca-baca
Sebab ke kubuet jeroh kin salahé kené nabi gere dosa
Terlebih ike benar tentu berlipet pahala
Arti ni saér Arabni kire-kire beta
Ulen Ramadhan sunguh olok terhormat
Wé ulen imulienen ari sebelas ulen siléwat
Uwo jema si berpasa wan ulen Ramadhan
Inile ulenmu
Iwan ulen oya Allah mungini kite berganimah
Berbuet jeroh si simen pahala
Olok mutuah jema si wan ulen ini mununung perintah ni Tuhen
Mujarak ni diri ari si larangngé
Den mudekat ni segele buet ku jelen ibadah
Kire beta si kufahami
Tabi ku ulama tengku si lebih mengerti
Buge si bertulis kin buah jari
Ganti ni berbagi bebuke wan ulen suci
Takéngen, Maret 2023
