[Puisi Bahasa Gayo] Doa Behu
Salman Yoga S
Ini doa teger ari kampung
Doa pengeras ari atu
Doa peger beden ari keben
Doa pengeri ari rui
Doa sebengang ari kalang
Doa pembehu berpuruh urum kuyu
Doa pengasih ari wih mumata mujaril
Doa kebel rayoh ari tanoh
Doa pejem bere ari rara peniten
Bebesi ari gesing pungkih
Doa sempena doa ni doa
Doa peneger semangat ari sudere biak
Doa pemberkat ari pakat
Doa ari doa ku si Sara
Urum kalimah Lailaha Illallah
Muhammadur Rasulullah
Puhhhhh…
Irupen ku salak
Perusen ku umuk-umuken
Sapun ku beden
Ari ujung ni wauk hinge ku ralik ni tapak
Puhhhhh ku kemul ni pumu
Puhhhhh ku siku uku saka
Puhhhhh ku seringkel gelengang
Gayo, 2022
*Dipetik dari draf naskah Buku Kumpulan Puisi Bahasa Gayo -Salman Yoga S – “BelBuk” ISBN: 9-786238-8208-18, The Gayo Institute (TGI), 2022.
