[Puisi Bahasa Gayo] Lime Asu Tue i Tugu Kute Takéngen. 7
Salman Yoga S
Enta kusi die enge seni belohhé
Atau kadang umurré nge sawah nisé
Asu i Kute Takéngen gere mukuburen
Gere mubangké gere mu atu nisan
Ara lime asu tue i Kute Takengén
Simokotté gere iyéroi jema delé
Asal modellé gere galak i até
Hinge mörippé lagu sesampé
Mugune gere si agihé kin beje
Iwan Al-Quran ara sejarah isurah
Asu bergaul jeroh urum lime pemude
Sawah ternomé beratus tun wan guwe
Berpaong setie dené ku serge
Sarami mien kisah jema banan pelacur
Hék gerahen asuni iosahé wih munajur
Minum degot dolotné alak musempur
Syukur rupen oya jelen dosaé lebur
Lime asu tue i Simpang Lime
Kukaléi gere né demu
Kadang arapé jemen dosangku
Salah pengkalung urum atu
Luke uki mudéngkoh uku
Ino ogoh nyesalku
Oyapé kukaléi
Oyapé kudenem i
Sebagé makhluk ni Tuhen
Sebagé tamsilen ku kite si berimen
Heme si muperasaen den mupikiren
Takéngen, 2014-2021
* Dipetik dari Buku Antologi Puisi Bahasa Gayo “Likes” Bab “Takéngen”, hal, 8-15. Takengon: The Gayo Institute (TGI), 2021.
