[Puisi Bahasa Gayo] Lime Asu Tue i Tugu Kute Takéngen. 5
Salman Yoga S
Makhluk si opat kiding ni pengaluten heme
Asu moyong nengét gere
Bau tangil beniri kiset lagu asu rungep
Sana si urus asu mukus gere berurus
Mata sayu lebuh lagu gedép ni mata anak nasu kucak
Séba mubelang supak lapuk perin temerke
Ara lime asu tue
Gere berempu
Gere mudengan
Gere mupeserinen
Gere mupenörépen
Lalé bediang i Kute Takéngen
Asal inile umahhé
Asal inile tanoh tembunié
Denie é iseputer kute
Iyo soboh gere beriro
Ara lime asu tue
I Tugu Simpang lime Kute Takéngen
Gere penah moyong bierpé iuyah
Gere munyatak lagu asu galak
Pakéa gere mera mugangu gere mungunah
Iacuk pacah ni atu gere mera musangka
Walaupé itetut gere wé kabang
Gere buntu delé taonné bediang
Nge damal biasa mörip wan kute si gemerlap
Asal pediangné nge muwilayah i lah ni kuteni
Iwan jema sengap atawe jema rami
Iwan jema delé berédo kuso-kini
Iwan jema besinte atawe kenduri
Kelem lao pakeni gere penah munangung
Ilengkék umah ni jema bang waé berlinung
Atau kadangpé nge mukurung wan sesara tung
Sehinge gere éngoné jin bersuluh pejujung
Takéngen, 2014-2021
* Dipetik dari Buku Antologi Puisi Bahasa Gayo “Likes” Bab “Takéngen”, hal, 8-15. Takengon: The Gayo Institute (TGI), 2021.
