[Puisi Bahasa Gayo] Lime Asu Tue i Tugu Kute Takéngen. 4
Salman Yoga S
Seseger mera remalan mugerewal jarak
Singah ku Gedung Olah Seni Blang Kolak
Nyino si berseni atawe mahasiswa diskusi
Tapé keberé lagu sigatin ton muluahi sinte
Ku arap ni kantur megah Kejaksaen Negeri
Gudang Cold Storage sigere berfungsi
Serapni Kantur BRI taon ringit kemas berpari
Kénér-kénér mah kulit remél ku kuduk kantur DPR
Kudah ara si tingir atawe si mébér
Betawe ku umah ni buku Kantur Pustaka den Arsip
Kegerepé ara tetulen ni iken keta kisip
Enta rilah ni kiteb selo nguk kin penörip
Dep gerahen ku teroto ni supu bejerip
Renye nyirip-nyirip ku geniring ni Kantur Bupati
Isoné bang ara janyi tengaha si kadang taring
Sehebet karib pakat jeroh cerak penting
Ike ara sitetah bermat jari eking
Asal paong sekulah jemen sara liting
Asuni pujejamah jelajah ringen lagu berpatroli
Mununung jelen si delé simen bunge besuen
Ara si ilah ni dené ara i geniring ni jelen
Berulung ijo ilang kemang wan musim uren
Pakéni apal den lebes pedéh gang urum lorong
Jelen ulak atawe ton tung sampah kosong
Asal oya bang nisé caraé mungaro kati korong
Méh-méh pangan perlon renye tetah derong
Mejen sayang di kite éngon sunguh
Sentan muserempuk gere tebuh tulung
Enta bebujang sedang renye mupengkalung
Sampé mukerusung sangkaé kabang
Takéngen, 2014-2021
* Dipetik dari Buku Antologi Puisi Bahasa Gayo “Likes” Bab “Takéngen”, hal, 8-15. Takengon: The Gayo Institute (TGI), 2021.
