[Puisi Bahasa Gayo] Lime Asu Tue i Tugu Kute Takéngen. 3
Salman Yoga S
Ku jelen lintang Simpang Wariji terminal lama
Pediangen utama si mera munaso mara
Ari warung Sinar Minang mera singah ku Gentala
Gedung berlatih para atlit Aceh Tengah berolahraga
Ku ujungen pora kantur ni Majelis Ulama
Silu ni jema si pehem agama munos fatwa
Ketapé selain program kerja lagu jarang ara
Puset ni umet mungune tentang halal urum dosa
Ari Tugu Simpang Lime sigatinné ku Buntul Kubu
Umah den kayu i masa Belene ara ilen si rubu
Pemarinné mutumpu ku Pasar Gulé bawah
Rami heme juel beli mumérah napekah
Si untung salung ara lebe mah kumah
Lebih tikik nguk kedik keta déba kin sedekah
Ituyuh ni kité Pasar Gulé ni jemen ara meja kucak
Sara kursi ari tung ni tomat den papan télak
Isoné aku mujege pemekaten ni almarhum bapak
Gerallé talu jema Sulaiman Aman Hafisah Meriah
Jeb semiyang waktu ruhul asar atawe lo jemat
Mujeje barang ulung lipah den bako bekerat
Depik kering berterpal warnaé ijo
Ari taon ini delé teles jema kuso kini
Ara si muneber teber ara si mubeli
Seseger mulintes asu Simpang Lime
Mumérahi tetulen körö tetuke limpe
Lime asu tue ni beluh jarang mera murum
Sentan mukum-kum renye perangkam
Sigatinné remalan sesara atau roa
Keta siberjangut item meran mu muang
Asu si warna ilang berpaong urun belang köring
Pediangné mejen sawah ku Pasar Paya Ilang
Melén si warna mupenguning den putih sangut
Meran peberguk i Tugu Nenas kute nge perunut
Takéngen, 2014-2021
*Dipetik dari Buku Antologi Puisi Bahasa Gayo “Likes” Bab “Takéngen”, hal, 8-15. Takengon: The Gayo Institute (TGI), 2021.
