[Puisi Bahasa Gayo] Lime Asu Tue i Tugu Kute Takéngen. 2
Salman Yoga S
Ara lime asu tue
I Tugu Simpang Lime Kute Takengén
Uzur den lanyutdi nge bang umurré
Kati janguttépé sidelené nge méh ruluh
Kulitté item coklat keréput mugegulung
Beden mugah nge mukeröping kering
Awahhé mupeperngah gerené muilih netoh
Gere arané taring nge murumpang ipon
Nyanya mungengal munyikit tulen
Mangan turah betelgap pelin beperlon
Ara lime asu tue
I Tugu Simpang Lime
Persis i puset Kute Takéngen
Dekat berbagé toko warung den kedé
Gere jaraktu ari Tugu Proklamasi
Pemulon Bendera Ilang Putih ikibaren jemen
Ara lime asu tue
I Tugu Simpang Lime Kute
Beluh beriringen mumérahi pakan
Tora pemuangen atawe tenaring ni jema
Mejen beluhhé ku taon ni sampah
Pujejamah urum langkah pora serapah
Ta kudah ara heme si murejeki mudah
Ara lime asu tue
I Tugu Simpang Lime Takéngen Kute
Bediang gere mera olok jarak-jarak
Ari BDP Acéh renya ku Kodim sawah
Ku Pasar Inpres den Lapangen Sanggamara
Ton jema mujuel bunge delé tempat jajan
Pegopoh-gopoh mejen mera ku arap ni Pendopo
Késot-késot selalu ku geniring ni Tugu Aman Dimot
Pegegéntot ari Balé Atu temus ku Kantur Pos-Polres
Nunung rerak kucak pukekerkes-kerkes
Lagu ara si pérah, osop wan uren luding serlah
Takéngen, 2014-2021
* Dipetik dari Buku Antologi Puisi Bahasa Gayo “Likes” Bab “Takéngen”, hal, 8-15. Takengon: The Gayo Institute (TGI), 2021.
