[Puisi] Kelem Beguru

oleh

[Puisi] Kelem Beguru
Zuliana Ibrahim

Kelemni nge i édangi i atas ni talam pengharapen
i tutung wan doa’a-do’a
jeb waktu jeb jengkal kesah

Ku si mukamul ni nipi
langit nge munelnom sara geral wan até
geral si wangi eri pepien bunge si tengah kemang

Kelemni i riling sebuku reduk ni ine
kata-kata lebih muacung ari runcing anak ni panah
mujaril wan uyet ni rayoh
sénguk iyolikni ulen-ulen si engkip urum nasehat amanah
murilingngi rembege sara bebujang urum detak Malim Dewa

Oi, kuyu lagu engkip wan dedeé
i ujung ni jejari akan mikot janyi
kowé saksi muacung tejem
I semelah kuen den kiri
Malaikat murum mubaca doa
Khususk mubentang

Kelemni lagu mu singket iwan ulué
canang i pumuni jema banan tue
lagu mumerusni umuk-umuk
surak mulawi kin pong nomé sig ere mera emis
bau ni uyem urum kepung ni aspa ari serapni jendela
beremus alus kowan umah rénung ni aman-inen mayak

Lebih mórip kelemni
calon aman mayak munarap ku kiblat
gerakni bibiré mubeda
mataé lagu becerak

*Diterjemahkan ke dalam Bahasa Gayo oleh Salman Yoga S

Comments

comments