Gelah Besingeten – Besijegen

oleh

Oleh : Wienku Genantan*

Terketike si seni nge mubilangen kite engon senuen gere neh bepeger, ara si peger erep be selgep belide ku atan tersik i ikot pe rum tali plastik, gerjen tomung tun ikot ne nge meh mureget. Senuwen si dele kite engon seni si wan lah ni ume, rom, lasun, tomat, ara si len-len e pe ilen, lagu ling oyane senuwen ne i terah e jeroh, i pupuki, i uweti olung si nge kering, i gemuri tanohe, dele ilen len-len pe, boh kati senuwen ni jeroh moripe meh oya ara miyen muhasil.

Dele nge senuwen si lah ni ume ne, macam berbage si bueten, boh kati dele bang kase hasile, harapen ne buge nguk bang kase mubelenye i kekanakni sekulah, ara miyen si becerak buge nguk bang kase masap dapur so, dele ilen si len pe.

Cumen, ara tikik lale, lagu ling sine, peger ni senuwen ni gere olok betetah, nengonne gere kep tu pasang ni belide orum ikote, nengone ike geh kaming muruntak meh bepoloken peger rum belide e ya. Teike nge sempat mayo kaming, koro, kude ku wan senuwen na kurasa meh bang i gaguti ye senuwen te a, akhir meh kulu bana, gere demu sanah pe.

Ara miyen, si mpu ni koro, kude, kaming, lemu, atawe si len-len. Oyape si meh kedelene gere ber-uwer, ara kase uwer, dabuh mpus rum ume si gere bepeger. Hat ne si dele kite engon pake ini i temet asal nge i temet, i barate ike perau gere neh musakaten, keta ike koro pe gere neh mutungkelen, oyale nahma ujute seni keta, mejen tangkuh ling gere jeroh ari awah te.

Si gatin ne senuwen te ni gere mera olok munengon ku patal oya ike si wan ume so, keta ike si wan mpus so pe, senuwen gere olok i perhatin ne peruluken si nge ara si gatin ne oya-oya pe i jorol i ye, mayo ku wan mpus ni jema h o si gatin ne, beta we si wan ume so pe, si dele kite engon nume neh nyawa ni ume i wan patal, nyawa ni beberasen pe gere neh i atan kal. Sikite engon seni osop pematang, bene peruluken,.

Cerak orum peri gere neh bepingang orum bebulang, nge meh taring maring, osop kekire meh tayuh akal, belang pe nge osop pancang, ume pe nge rata meh pematang, keta ke mpus pe meh mugerol peruluken nge lagu gerol ni nipe.

Kurasa ku sudereku, gere bang tedaten si lagu nini, osop bang pantik genuku nahmah teraku meh bang pangan supak si kerna nge meh i deret ni tarak buet ni, keta koro kude pe nge i deret ni peger buet ni nge lagu si serdah ku awah ni kule,. Nge nguk kurasa kite kurangi sepak kati enti sawah cabang rum ranting muselpak, gelah i taringen lomes orum tikel si i palit ku bibir, buge gip aro lomes kati gip bele jarak seteru ari kite ni.

Boh si papahen kite, be si tegahen kite, enti ne be si tipak dagun kite rum kite, enti neh be si ko’ehen. Kite jegei bewene senuwen te, bik ni suderente pe, dis ne we, anak mu aku – anak ku anakmu, bujang berine – beru berama.

* penulis adalah wakil ketua 1 Majelis Adat Gayo (MAG) Aceh Tengah

Comments

comments

No More Posts Available.

No more pages to load.