TEKEBUR
Oleh ; Tgk. Mudekala
Telah berkata Nabi Muhammad
munerangan jengkat membesarkan diri
wanni hadis Nabi berwasiet
hadis i riwayat Muslim dan Tirmidzi
Gere lulus ku wanni serge
baring sahan heme tekebur wanni ate
i wanni ate tekebur berumah
seberat zarrah anak ni sawi
Ku Rasulullah renyel bertanya
ara sara jema seorang lelaki
wo Rasulullah aku mungune
kunehmi die pakaian belangi
Ike sara jema pakaian ne jeroh
gayani tubuh rancak den tari
jema lagu noya ketekebur jengkat
si gere siet ku surge sejati
Nabi Muhammad mujeweb tutur
makna tekebur nume oya arti
ke lebih ilen Tuhen mampat mutlak
tuhen bergalak kin jeroh belangi
Arti tekebur munulak kebenaran
bier ari sahan gere iperduli
nan mien muhinen jema
kati kotek jemawa ku khalayak rami
Kediken jema wa kase nge busuk
temas we sesuk munatasan diri
arti tekebur oya roa macam
depet ipaham ari cerak ni Nabi
Nume kerna upuh iseluk i beden
nume kerna pakaian jeroh belangi
nume kerna pakaian nge muterpuk
nume kerna rongok nge berdasi
Nume kerna alus ruje ni upuh kerung
nume kerna tudung jeit muriti
oya bewene kerna muhormati beden
sedangkan Tuhen galak penadi
Makna tekebur oyale muhinenen
munulak kebenaran geh kene Nabi
buge ku kite enti kire kona
sipet oya ilarang Nabi
(Disalin dari buku Pedukah oleh Novarizka Saifoeddin, Cucu Tgk Mudekala)
