[Novelet WRB] Alivtina [8]

oleh

Karya: Win Ruhdi Bathin (WRB)
Diterjemahkan Kedalam Bahasa Gayo

Oleh: Aman Renggali

WRB-3REJE ijege den iawasi oleh Imem, Petue den rakyat genap mupakat. Kekuasaen Reje gere nguk kenak dirié, kenak ni nesué. Tapé idasari kesepakaten murum, antara rakyat, Imem den cerdik pané. Musyawarah den mupakat, pertimbangen akhiré ara i pumuni ulama. Berdasari al-Qur’an den hadis nabi, isebut urum Sarak Opat.

“Oyale sebebpé, ari sekian delé den lues ni wilayah Acih, Gayo mubeda urum paké pesisir. Demikien hallé  Alas, Aneuk Jamee den silénné”, rinciku. Alivtina munanguk-angukken ulué, enta pehem atawe gere oya mi.

Kuénomen kupi ara pepien degod si isiep ni Ine wan termos kucak urum tutupni  termos sa kin gelassé. Kutuangen kedet ni kupi, kemudien kutuangen mien sara gelas mi kin Alivtina.

”Énomennye kupi asli ini kati mupesam pora beden”, kenaku mujurahni gelas tutup ni termos ku Alivtina.

Sesire ménum den betupang ku ukué, Alivtina pecengang ku aku.

“Win!”, kené Alivtina. Linggé tenengé lagu mutegas den murelem.

“Ya”, kujeweb mungiseren rupengku kowé sire munyélukken rokok kretekku.

Alivtina pecengang kuaku tejem, agak kikuk aku ibohhé.

“Sana de?”, pengunenku lagu muheran pora.

Something wrong…..?”, pengunenku mien.

“Sunguh aku saat-saat silelagu nini sikukaléi. Kunul reroante i tempat si mampat lagu ini. Reroante we. Aku lagu iwan ni nipi rasaé, tapé ini nyata. Indah olok”, ungkep Alivtina. Ongot aku den kudatén wé renye becerak kindirié.

I feel so bluess..Win…”, ucep jema banan asal Rusia siberumur 25 tun ni. Alevtina mungiserni penéngonné ku pematang ni Takéngen. I uken ni wih Pesangen pedenang kute si sesebut jema ‘Negeri Antara”.

“Ya..inillé simunos aku dor wan denem ulak ku tanoh tembuni ini. Aku nge  penah morip i berbagé kute i Jewe, urum berbagé buet den posisi si muhasilni ringit muara pora. Tapé enta mukune ara rasa kenakékku dor ulakwe kuini. Ara si gere terlupenen den denem géh kuini…”, terangku.

“Isien, memang agak musólit soal penghasilen berupe repie. Tapié aku murasa aténgku ara dor isien. Aku ulak mien kuini, walaupé henye mujadi petani ni kupi. Simen ari kute ni si menurutku mujadi misteri den lagu besi berani siturah iungkep. Enta secara ilmiah atau bathiniah. Emile…”, ucepku hampir gere tenengé.

“Win, nume soal oya!”, samut Alivtina munamat ni pumu kuenku.

“Ini soal perasaen. Aku begalak até kin ko Win…” kené Alivtina mugeguncang-guncang pumungku den munéngon tejem mata-ngku hinge ulunaté. Ineh, jantungku berdegup olok gere munentu.

Alivtina kemudien ongot, tapé mataé tetap mumanang ku aku. Sebalikké, akupé munéngon kowé. Roa pumué munamat pumu kuenku ilené. Tapé kemudien aku munungkukken ulu, pikirenku menerawang enta kusisi. Ling emus ni kuyu mudesir mulewasi ulung ni uyem si lagu juteen jarum tejem si mupantik. Tenengé demikien jelas iwan kemiringku.

Sir, desir  berdeso….

Langkah ni kuyu e e e e

Beremus ku uyem rubu mutumpu batang ni sangé é é é é é

Ku batang batang ni sangépé la mejen

La mejen mampat dikuerah a a a a

(saér lagu berjudul “Uyem”. Cip. Tgk. Ali Asni Asir-Asir)

“Gereke rasako sana si kurasan. Ari pemulo ramah urum ko i jejaring sosial hinge saling mungirim email, perasaenku nge begalak até kin ko Win. Aku gere lepas den gere mera muingkeri perasaen si wan até-ngku ni. Aku mencintaimu Win.”, tegas Alivtina sire muluahni kecal ni pumué ari pumungku.

Aku petungkuk ilen.

“Oyale alasen sana kati aku mera mujadi relawan. Berharap tir mudemu urum ko, setir-tirré singuk kuusahanen. Kutaringen Zelenodolsky, munempuh hampir waluh ratus kilometer munuju Rusia. Ari Rusia ku ini, ribuen kilometer, 7000 kilometer lebih. Ku urumi ujien mujadi relawan, lulus kemudien berlatih tulu bulen. Bewéné demi kune kati nguk mudemu urum ko Win. Apakah oya béwéné gere genap?”, pengunen ni Alivtina ku aku.

Aku pencengang munéngon kowé. Demikien juge wépé. Akh, perasaenku lagu mugerak pora. Begitu kul pengorbanen jema banan belangi urang Rusia ini, aku membathin. Tudung tipis si mulilit sekederé i ulué, syal, jékét den seruel jens serta sepatu atassé, teridah munos Alivtina demikien semperne sebagé jema banan. Apalagi itamah mien urum kulit pótihhé serta mata biru. Lagu bayangen bidadari, kegerepé dis lagu noyale kire.

Kuperusen ulué si ibalut urum tudung tipis oya. Alivtina kemudien munamat ni pumu-ngku den murapatné ku rupeé sire mongot. Wah gabukké, bathinku. Gere penah aku munéngon jema bule mongot lagu nini. Kecuali iwan film-film. Perasaenku campur aduk.

Kudaten Alivtina mongot, kati perasaenné tangkuh den muluah urum wih jernih ari mataé simampat ta. Mata-ngku gere mukecép munéngon kune jema banan Rusia ini mongot. Néngonné disné we. Sumpah, akupé malé terbawa perasaen.

Nge agak murede pongotté. Alivtina munelap wih luh ni mataé urum syal. Alevtina munamat ni pumu-ngku mien.

“Win, hel sana miwe siturah kubueten kati ko yakin akan cintaku?’, pengunenné. Matani kami mudemu panang mien.

“Gere ara!. Gere ara néh siperlu i buktin ko Alevtina”, tegasku.

“Aku pecaya kin kul natému. Dis lagu perasaenku kin ko. Nge kubaca perasaenmu ku aku ari béwénénné email si kirim ko. Lagu tentang jema rawan i kutemu si igeliwi atému kerna mera minum-minumen beralkohol sawah mabuk den lupe diri den mera bebuet sanahpé”, kenaku sire sesuk.

Ku tutungen rokok kretekku.

“Ku betih juge perasaenmu saat ko munyeriten tentang Ekaterina, sahabat karibmu si kerje urum David ari Canada. Aku paham bahwa ko bekenak malé munyeder bahwa perkawinen beda negara, ras den agama nguk bahgie. Walau perkenalannné hanya lewat dunie maya.

 “Alevtina, betihkoke, aku jema rawan paling bahgie saat seni. Mukune?. Kerna ara sara jema banan belangi asal Rusia si mencintai jema kampung lagu aku. Gere kubetih sana si menarik ari aku sehinge munosko begalak até”.

Inile si sesunguhé olok ku terihi. Ara jema jatuh cinta ku aku. Ku betih, kurasanen béwéné makna bahasa si igunen Alivtina. Bahasa ni jema banan si kasmaran. Gere peduli lintes batas negara.

“Si rasan koa, dis urum sikurasan. Aku juge begalak até kin ko. Sejak pemulo perkenalente”, tegasku sire kunul mien i dekat Alivtina.[] Bersemet…

Comments

comments

No More Posts Available.

No more pages to load.