Syaer Gayo Abdurrahim Daudy
Berkata nabi Muhammad,
munerangan ku umet doa gere makbul
ara ke ibetihko bewené jema
tentang ni doa sigere makbul
Gere terime tuhen doa ni jema
kediken ara doaé apul
awah berdoa atewé lalé
lagu si lengé peninget muraul
Gere sunguh até muniro doa
orop nge ara gere dalih betul
kedikén até nge mujejawang
bier sembahyang nge uwet kunul
Awah mubaca até berkekire
béwéh si rike nge telam timul
tengah ibedet pikiren terbang
lagu lelayang sigere berkampul
I soné ate nge mutetayang
isikin pematang nge teridah buntul
isikin sagi méh jep jep lengkék
isikin relét nge teridah arul
Enta isihen tekebir isihen wajjah
enta isihen fatéhah urum atahyatul
gere ibetih arti ni baca
sana diye mana iperinen qul
Enta isihen ujung isihen ralik
nge mubebalik nge dabuh kancul
cube itimang urum pikiren
mera ke mumangan ike parang tumpul
Dup dowa kebbel mera mujadi
kerna sunguh até i-upul upul
karena perasanné ara berpaédah
waktu bertengkah mera wa semul
Doa pengukup urum pegempar
doa teger urum penimul
tapi tekebir sawah ku salam
ate belayam nge mugerupul
Nge mari semiang dabuh berdoa
ikecépen mata lagu jema sugul
nge munge gerenang dabuh geritik
nge lepas depik itama cangkul
Apabile semiyang si mengoh noya
Nabi berkata mana bisa makul
kite muniro nume kukekanak kucak
kite bercerak urum Zat Maha Kul
***
Kiriman : Novarizqa Saifoeddin
Abdurrahim Daudy dengan nama pena Mudekala adalah seorang ulama di Gayo yang selain menulis saer juga sekaligus dapat menyaerkan dalam acara-acara tertentu,karena beliau memang memiliki suara yang merdu.
Tafsir Al Gayo, adalah salah satu karya sastra beliau yang di cetak di Mesir, Kairo tahun 1938.Lahir di Kebayakan, Takengon, Februari 1910, wafat tahun 1961 di Baleatu Takengon
