[Cerite Berbahasa Gayo]
Salman Yoga S
KUNUL wé semile, arappé ku dapur peniten. Bébéré gere mugegerak, gere mugegémot mubaca doa lagu sidelénné guru kampung. Alat-alat murajah seumpama kemenyén, mungkur, ruje pótih atawe wih pótih wan ayan. Mataé we seseger mukekecép emusni asap ni rara.
Utem basah si itutung kin penirun olok mugangu. Bierpé dapur peniten si jeb lo munepong nowé, terlebih ike wan musim uren. Dapur peniten si sangut oya sabé munangkohen asap ni rara hinge gelep ruangen obohhé. Oya bewené nume syarat ni doa si kati nguk berhubungen urum alam gaib.
Lagu murid simalé munerime penaléngen ilmu kebathinen. Lemem, jema tue oya gere mugegerak. Puger pekunul, ongot. Jema tue oya mugerak pora ulu urum pumué kerna asap mukepung kumataé. Seseger isintungné utem peniten, munulaken arang den munangkohen bere ni rara. Mataé mutuju ku utem si pangan rara den ku sara tubuh si pekunul i arapné. Tapi gere mugedéppe wé .
Itónóngni Puger arah penéngon ni mataé si petangak ku kaso bóbóngen ni umah. Gere ara samuten munerime jamu atau pengunen “ara maksud sana semawah ku batang ruangkuni?”. Langit-langit ni umah sigere berlapis munóróhen tulen kaso den tulen ni supu serule si nge item. Rapi musósón óróm umah ni lelawah peregang juge si nge item. Seluruh langit-langit i ruangen oya bewené item kecoklaten, sebagé tene jema tue oya nge lemen berhubungen óróm alam lén.
Jema rawan tue si mujangut dagu den beserben pótih gere we mugegerak, bierpé Puger nge pepienni matuk peputeterém. Penyakit sesak nafassé mera kumat, tetapi wé tetap kunul mutenetappen diri. Wé munantin sesire berharap guru kampung oya nguk muyangupi sana kin nietté.
“Mubota kedie jema tue ini”, pikir Puger wan atewé.
Sebeb ari sawah nemi mata ni jema tue oya gere munéngon ku Puger singe pugegedép mata munehen asapni rara.
“Kadang wé gere mutenengé”, sebeb nge mupepienni Puger muatuk-atuk keméréng nijema si ianggap keturunen wali oya gerewe tenengé.
Muselang pepien menit, wan asap ni rara ari peniten item silagu iringni emun item i langit, mugulung den munyesaki ruangen, icube Puger nuke sepatah cerak. Berharap jema tue oya mesut. Sepatah roa patah kata, tulu opat den sepuluh kelimat wé becerak, Awan oya lagu mugerak pora, meski wé teridah lagu murélingni syal lé ku rongok.
Puger minah kunul, kati enti kona asap ni rara ari dapur peniten. Wépé muloi becerite naru konot prihel hasrat urum niatté kati géh mudemui guru kampung oya. Muloi ari persoalen kanturré sawah urusen Ruksan den Gunedi, pongngé simunginié mudemui jema tue beserben pótih.
”Seingetku, baro seni aku becerak jujur, gere kutetuni sanahpé. Enta sana sebeb kati i arapni jema tue ini aku jujur”, kené wan até ni Puger.
Sanahpe gerak den buetni jema tue oya i cengangi Puger. Wé berharap segele masalahé sélésé, apakah wé turah pakék jimet atawa sanahpé, sipenting ara jelen tangkuh ari persoalen sitengah ihedepié. Kebetapé lagu gera ara samutten ari jema tue oya. Awan tue oya kunul semile pumué munamat tesbih, seseger alis mataé mugegerak munampisni asap ari peniten item i sampingngé.
Puger gintes ketike tibe-tibe jema tue oya lagu muterém malé becerak.
”Ulakmiko, penitenmu item, jelenmu item. Tunu den sintung sana simucaya wan dedemu, tónóng den anuten ku uken. Insya Allah sara waktu kasé peniten si ara wan dedemu akan mujadi jernih,” kene jema tue oya óróm léngngé lagu mugedér. Puger pebening, ari ujungni wuk sawah ku ujung kédéngngé lagu kona sirem wih ni emun bengi ari ólóng ni kayu wan uten, mugerak jiwe é, muguncang kesederenné. Puger mulongkop wan dené diri é.
***
Cerite konotni iterjemahen ari judul aslié “Tungku Hitam”, singe imuat i media cetak dan media online.
