Salman Yoga S
JENAH gere murasa seseréngé den sengap ike tengah melem, lagu singe-ngeni gere ipongni sirawan. Sebeb jeb musim berume, Jolung tangkuh ari umah mujege wih. Jenah maklum, nge pepien musim munomang uren sabé turun puren. Jema tetue mumerénné inile si iperin salah musim.
Kebetapé, Jenah memaklumi ówih si géh ari uken semakin kurang, terlebih uten si munyerap den munaso wih nge mulo itebangi jema ari kute. Seni bur-bur i sekiter Kampung Geldok nge lagu ulu ni kekanak budak, lémus, gutul gere beruwuk. Wih tékék, benatang penghuniépé osop belang pemangananenné. Kerna oyale, Jolung turah tetap mujege anutni wih, den rom siben itomang pepien lo si lalu nguk morip semperne. Meskipun nge ara bagin den jeme sisepakati tetiep jema siberume, Jolung turah sabé mujegei é. Ike gere, arawe jema si ilet munyompongni belbuk jemeé.
Sobohni, nge mari mubersihen dipan penomén, upuh jebel den seperé gasut Jenah mukekarat beluh ku telege. Pótih ni emun sirapat ilen wan ulung ni kerpé ari kelemnemi gere méh ilen kering. Kebetapé, léng ni manuk nge tenengé sut samut ari jep ranting ni kayu. Jelen setapak munaréngen nami. Tentingen wihni nami i ulung ni kerpé menenting. Ópóh kerung tengon mata gong isilakné sawah ku uku, kati enti basah kona wihni nami. Tis putihpé lepas. Remalan seseréngé ku telege jernih i ujung ni kampung sesire munéméng bukuten penesahen ipumu kuen, time sabun i pumu kiri urum anuk tue pesantir i kerlangngé.
Damal ni soboh mukemang. Asap ni utem ari dapur umah-umah ni penduduk murasa ku éyung lagu minyak wangi si seheje den sederhana ni morip. Eber-eber lo lagu temabur. Lo nge mutuker. Morip bersemet. Seisi Kampung Geldok mutoét. Lagu anakni korék simuningokken ulué ari tempurung nitenaruh, sesara jema teridah muloi tangkuh ari pesamni umah papanné masing-masing.
Jenah remalan munónóng jelen setapak. Lagu soboh-soboh sebelummé, wé munuju ku telege sekeder bersih-bersih den munesah ópuh. Kesehejeenné dis urum pemetihné, tentang kejadien kelemne i pematang ni bur semelah élopen. Sara manusie nge mujadi mét. Mubujur i atasni patal ulu ni wih, urum bajué singe murerébék. Pumu kirié mungecalen rongok, den pumu kuenné metus sawah ku kerlang. Bekas luke élésni bene tejem teridah mukoak i kuduk den jep rembege é, kebetapé gerené munangkohen rayoh. Lagu gerisni gulé singe iramuli asam jantar. Tubuhé mubujur gere mugegerak urum luke dengké nge pepótihen.
Kelemne pepien asu memang ara moyong, tenengé kéruh i lah ni ume. Tapé gere sahpé berani tangkuh ari umah munéngon sanade sitengah terjadi. Pikir ni pakéa, babi uten turun mujongkorri kepile atau senuen gantang ni penduduk. Den tuges ni asu mubioié urum cara ioyongi. Silelagu nini hal biasa bagi masyarakat Geldok, terlebih mien i musim kemaro babi-babi turun berédo mungenal mangan ku sesagi empus perumen.
Serloni, bilangen ke-opat puluh ni Jenah mudegotten bahgie den lemak lungi é sebagé Inen Mayak ayu. Wé i kintéi den ikerjei Jolung, bebujang ari kampung semelah si ibetih jema rajin, bertangungjeweb den ari keluarga jeroh-jeroh.
“Ko mutuah Jenah !”, kéné Nila sesire munyangul ni wih ku Jenah.
“Mutuah sana woy Nila ?”
“Ya, mutuah ko i sunting Jolung, bebujang mampat den rajin !”
“Ah Nila, ko ara seje !”, sutti Jenah lagu musipu.
Selesé bersih-bersih den mumungen penesahen, Jenah betetah ulak. Tangungjeweb den kebiasaenné munyedien kupi urum mangan soboh kin sirawan mulintes jelas wan ulué. Perjelenen ulak, ari gip Jenah munerah éréng-éréngen jema kampung remalan atan patal ni ume menarang kerne. Pepien jema ara si munéméng ópóh kerung den parang sesire munyebut geralni Allah serta shalawat Nabi. Gere lemen ari oné i ungerné hal oya ku Nila sitengah berenem, kemudién wé mukekarat beluh serire munéméngen time é.
Gere ara firasat sanahpé wan até wé, sana kati sesoboh renam ara éring-éréngen jema remalan i lahni ume sesire beselawat lagu mah bayi malé munerime ukum. Otokké kiset bepikir pemanangen si gere lazim oya. Pikirenné kune tir sawah ku umah sebelem matanlo nik, berédang mangan, salin baju den pora bebedak renyé munyamut géh ni sirawan i awah ni pintu si temunuh kerna mujege wih nume ari kelemnemi.
Jema sekampung mulei kéroh den saling besisu, sesuk i gendéréng ni déné munuju kampung unang-unang malé ilintesi karnaval tujuh belasen. Ara kejadien si luer biasa i lo soboh jemat oya, kejadien simerawe terjadi wan jeb musim munomang den kelem jemat.
“Géléren ni sahmi we séni ?”
“Gere kutóhó !”
“Abdi den Munzir mudepetné i atan patal ulu ni wih óróm pumu kuen puntung den baju si murerébék murerayohen”
“Pumu puntung ?”
“Ya, pumué puntung”
“Sanade si terjadi ?”
Muselang roa umah den tulu tempéh ni ume rap sawah i elem-elemen umah kucakké, umah si tos pemerintah gantini umahé si muséut wan tengah konflik. Jenah munérah pemanangen dis. Langkah ini otokké muputer, bacar.
“Sana kati éréng-éréngen jema i lah ni umene munuju ku umahku?”
Sesire bepikir Jenah mamang mulangkahen kédéngngé, tenéméngen time den anuk mukepir. Soboh lo si munaréngen nami den sejuk ni kuyu gere mureden gunah naté Jenah simunamoren alak ari ulu den selibenné.
I silakné pora opoh kerungngé ku atas ni uku mubacarni langkah, Jenah remalan munónóng jelen setapak si sempit, lagu jelen kampung si medul den muatu-atu, tapak kédéng den téssé si lagu uwah ni rom bibes berganti ayun. Peningetné tertuju ku Jolung, gere ara lén kesimpulenné.
“Oh.. beingku !” sintak kesahhé relem, munemus uyet den tetulen tubuh.
“Bang..?”
Pongotté mumacu langkah, sara roa rak ni ume iluncettié. Tudung pótih munelepni penéngoné i ampisné. Umahé sibersemelahen urum kampung perasané mujarak.
“Aku yakin Kule oya we !”
“Ya, Kule singe mumangan Aman Selki, Salwa den Rizal”
“Mungkin kule oya simunyéwékni Jolung”
“Kule oya nge mudemun lemakké. Déngké ni manusie !”
Patutté, lagu Aman Inen Mayak ayu Jenah irebahen i ruang lah. Bersanding, pegenyur persis i sampingni si rawan sipetegang, ari penéngolen pepien jema ari wan rak semelah ni dené. Alakké muramul urum luh mata den tanoh lédak i lang i pipi ni Jenah teridah mubelang, mubentuk sapuni kuas warna belang i kukut, awah den kuduk ni Kule.
Reroanné isebun urum tanoh ilang wan sara luang lét. Kóbórenné megah i sesebut jema sebagé kóbórenni Aman den Inen Mayak Kule.
- i terjemahen ari judul aslié “Pengantin Harimau”, singe imuet i media cetak.
