[Saer Gayo] Edeb Ménum
Tgk. Mudekala
Wan sara hadis rawahul Dailami
ara icecari perkara adab
sesunguhé nge berkata Rasulullah
iterangné tegah ku béwéné umet
Apabile ko muminum weis
gelah tikik-tikik ningko idolot
enti iénumko ningko weisa
enti sampé keta minum mudegot
Minum mudegot munyakitni jantung
até mugulung rasaé pedet
gelah ipatih carani Rasulullah
gere iosah minum mudegot
Minum mudegot mucampur kuyu
weisni labu tangkuh mulumpet
buet lagu noya ara kite cube
selagu kite ulak ari buet
Ari kerna gerahan gere ipeduli
cerakni Nabi gere né kite inget
kin penyakit jantung gere né terih
perin tulenni weih nge salah dolot
Pedehal weis gere mutulen
iosah Tuhen sipeté lemut
ike kerna minum seger berkesah
ari kerna gerah kati mudegot
Abdurrahim Daudy dengan nama pena Mudekala adalah seorang ulama Gayo yang selain menulis saer juga sekaligus dapat menyaerkan dalam acara-acara tertentu dengan suara merdu. Tafsir Al Gayo, adalah salah satu karya sastra beliau yang di cetak di Mesir, Kairo tahun 1938. Mudekala lahir di Kebayakan, Takengon, Februari 1910, wafat tahun 1961 di Baleatu Takengon.[]
