[Cerpen Basa Gayo]
Oleh : Fathan Muhammad Taufiq
Nge roa ló ni pak Syamsul galip pebening wan ruang né, mejen i pepeciké ulué, olok di bise bang irasaé. Nge malé sawah ujung tun, tapé delé ilen buet si gere selesé, delépé anak buahé i kantur, tapé lagu gere sarapé si mera tuntas bueté. Oya kati, sebagé Kepala Kantur nge lagu mujening utok ni pak Syamsulni. Ara tulu Kepala Bidang wan kantur ni pak Syamsul, tapé gere sarapé si menguasai bidangé, bierpé nge atas pangkaté, tapé lagu gere pehem kin tugas pokoké, nge gati i osah arahen, bimbingen dan petuah, tapé bewené lagu wih lalu.
I séluké rokoké sesire bepikir mungenal jelen tangkuh, nge engkip asbak si ara atan mejaé, ari sobohnemi, entah nge piyen bungkus i ménné. Gelas kupi pé nge mupiyenen tuker, tapé nampaké gere demu ilen jelen tangkuh si jerohé. Nge kiset rasaé pak Syamsul ni munalu para Kabid ku ruangné, gere penah i demue solusi.
Tibe-tibe pak Syamsul muninget kin Tengku Amin, guru ngajié masa kucak, nge mokot wé gere bersilaturrahmi ku tengkua,
“Ara jerohé, aku muniro nasehat ku tengku”, beta kire-kire si mubayang wan utoké. Gere mokot ari oné, i uripné motoré renye selalu mutuju ku umah ni Tengku Amin, gere lupen wé singah ku mini market, mubeli sekeder buah tangan kin tengku ne.
“Assalamu’alaikum Tengku”, pak Syamsul munosah salam sentan sawah ku pintu numah ni Tengku Amin,
“Wa’alaikum salam warahmatullah” beta sut ni Tengku Amin ari owas.
“Kowas ketua”, samung ni tengku.
“Berijin Tengku”, ilekohné sepatué renye nik ku umah ni tengku si beperatas.
“Hana keber ketua, lagu nge mokot gere pernah singah, olok sibuk nérahé sumur kin pejabat ni”, berakah ni Tengku Amin, metungkuk ulu ni pak Syamsul, lagu kemél pora mumengé berakah ni tengku ne.
“Maaf tengku, sebenaré ménét pedéh aku singah kini, tapé betul kené ling tengku ne, nge olok tu sibuk aku seni, kune keber tengku?”, pak Syamsul munepat ton kunulé.
“Alhamdulillah, aku sehat-sehat seje, hana kati seseréng, gere i mai kekanak ni”, sut ni Tengku Amin.
“Aku selalu ari kantur sine tengku, lén lo kasé kumai keluargangku”, kené pak Syamsul,
“Ike kuéngon ari salak ni ketua, lagu tengah ara masalah beret nampaké”, Tengku Amin cuge munerka.
“Betul tengku, nge roa ló ni, lagu mejening utokku ni”, mesut pak Syamsul.
“Oya kati géh aku kuini, malé muniro nasehat ari tengku”, Tengku Amin kedik mumengé kekata ni pak syamsul,
“Gere ke salah oya ketua, aku ni ke guru ngaji we, selo kubetih urusen kantur”, kené Tengku Amin sentan mari kediké.
“Mungune aku tikik ketua, hana kire-kire permasalahen si tengah i hedepi ketua?”, pak Syamsul pebening sekejep,
“Begini tengku, ujung tun ni nge tingir, tapé delé ilen buet wan kanturku sigere ilen munge”, pak Syamsul munuke permaslah né.
“Hana kati nguk lagu noya ketua, gere ke delé anak buah ni ketua si pané bebuet?”, sut ni Tengku Amin,
“Betul tengku, delé anak buahku i kantur, tapé lagu sara roa we si lepas bebuet”, pak Syamsul mulei “curhat”.
“Tapé kéngon, pelin serjana le anak buah ni ketua, hana kati nguk lagu noya?”, mungune mien Tengku Amin.
“Oya le tengku, ara tulu Kabid, ara onom Kasi, tapé sara pé lagu si gere pehem urum bueté, jep i osah buet, gere sara pe si mera tuntas”, mesut pak Syamsul olok di teridah gunah wan até wé.
“Hana kati gere i usulen jema si mampué kin mungunuli jabat né, memangé gere ara pegawé si pané wé?”, mungune mien tengku ne, i éngoné kegelisah ni pak Syamsul, i jangkoné wih potih osan né ku pak Syamsul.
“Berijin tengku”, i ukené tutup botol ni wih ne, renye i degotné wih si ara wan botol ne, agak mutenang pora pak Syamsul.
“Ara memang tengku, sara roa pegawé si ku éngon mampu dan pané bebuet, tapé owé staf biasa, gere lepas aku munusulné kin Kabid atawa Kasi”, jeweb ni pak Syamsul.
“Hana kati lagu noya ketua?”, Tengku Amin lagu makin sunguh munyimak.
“Begini tengku, ara peraturen bahwa si nguk kin pejabat ni turah pegawé si mu ijazah serjana, sementara pegawé si kuperin sine, owé tamat SMA pelin tengku, oya kati pusingen aku ni”, kené pak Syamsul, idegot né mien wih si jurah tengku ne.
“O, jadi kerna oya, jadi kerna peraturen oya, pejabat si gere pané bebuet pé i pertehenen? Ike lagu noya patut pé pusingen ketua”, jeweb ni tengku.
“Ara ke inget ketua kin ling ku pudaha, ara sara hadis nabinte apabile i serah ko buet atawa amanah ku jema si nume ahlié, nantin mi kehancurenné”, pak Syamsul makin pebening mumengé ling ni tengku.
“Jadi munurut tengku, hana kire-kire jelen tangkuh si jerohé?”, pak Syamsul mungune, sementara Tengku Amin kedik mien, agak mokot tengku ne kedik, sehinge pak Syamsul lagu makin mutamah macik.
“Begini ketua, nume aku malé munejeri ketua, aku ni jema ogoh, tapé munurut aku, turah kite ulakan ku manat ni jema tuente jemen”, jeweb ni Tengku Amin sentan mari kedike.
“Maksud ni tengku manat sesi oya”, pak Syamsul makin penasaren.
“Ike sediken sesat, ulakan ku dené”, jeweb ni tengku singket.
“Aku gere pehem kin maksud ni tengku”, pak Syamsul lagu sengengongen.
“Ini masuken ari aku ketua, udah gere cocok kasé, keta enti i pakék”, samung ni tengku.
“Sine ara perin ketua, bahwa ara sara roa pegawé si mampu dan pané bebuet, oya padih i usul ketua ku atasen kin pengganti pejabat sigere pané bebeuet ne, enti né éngon ari si jema wa, enti i éngon hana ijazahé, si penting munurut ketua wé mampu hana kati gere i cuge. Kerna sebenaré si butuh ni ketua seni nume ijazah tapé kemampuen dan skill si bersangkuten, ike peraturen ni manusie, oya nguk i ubah, kecawali peratur ni Tuhen, oya si gere lepas kite ubahi. Tasana turah i pertehenen serjana wa, ike mudelap pelin we pané, oya kati rusak denie ni, turah i ulaken buet ni ku jema si mampu menemah amanah dan pané munetah. Nume jema si pané munéméng ijazah tapé bueté munos mesalah”, agak naru Tengku Amin munosah masuken, pak Syamsul pé anguk-anguk ulu.
Agak mokot pak Syamsul pebening, betul kené tengku ne, turah berani aku nos perubahan ku arah si lebih jeroh, bêta kekire wan até wé.
“Maaf ni ketua, ari sine mi gere géh kupi, paké umah ni tengah bebelenye ku kedé, ke kanak ni pé nge méh beluh sekulah”, kené Tengku Amin, pak Syamsul agak gerle, kerna wé tengah mumikiri langkah selanjuté.
“Gere sesanah tengku, malahen aku si niro maaf, nge muganggu tengku”, jeweb ni pak Syamsul.
“Ike beta, aku niro permisi tengku, berijin atas masuken ari tengku, nge ara mu terang pora pemikirku seni”.
“Boh mi keta ketua, tape ke beta pé ike kire-kire sana si kuperin sine meunurut perasan ketua gere cocok, keta enti i laksanan ketua”, Tengku Amin mujule jamué sawah ku awah ni pintu.
“Assalamu’alaikum” kené paka Syamsul sesire tangkuh ari umah ni Tengku Amin.
“Wa’alaikum salam warahmatullah”, jeweb ni tengku.
Nge bulet tekat wan até wé, mari ini turah aku menghadap ku atasen, betul pedéh sana si perin tengkune, beta cerak wan até ni pak Syamsul. Iuripné motor munaringen umah ni tengku, gere ara né gunah wan até wé, kesanah pé resikoé, nge siep pak Syamsul munangungé. Siara wan pemikirené seni, kune masalah wan kanturé nguk tir demu solusié.[SY]
