[Cerite Bahasa Gayo]
Salman Yoga S
Sanade perlué munyebut geral?
Jadi oya geralmu.
Ike lagu noya keta gélérenkumi we, geralku Anu!
Tapi sebelummé gere daléh mulo sahen geralku, kerna geral lagu anakni panah ari gagangngé si sombong. Pemuloni silsilah si kabur, den kata bersitorin sebelem lupen. Geral mujadi penting ketike kite nguk muhubungni ulu urum até, nume peningeten atau we ucepen perséh urum ling unang-unang ramah olok.
Si jelas aku sabé den dor mujadi sibermanfaat den dekat urum kam. Bahkan dekat olok. Mungkin saat besilopé aku dekat urum sahenpé. Aku ara kerna iciptanen kati ara. Aku morip den mukemang wan den i alam ni. Sebagien memang ara si sengeje iperalai jema, kebetapé jumlahhé gere delé. Moripku jarak ari ramini kute. Meskipé ara simorip den mukemang i antaraé, rap urum menusie siber-umah, bebuet den dediang.
Wan moripni manusie aku penting. Gere ara ilen sara teknologipé sawah seni si mampu mugantinné. Ike arapé kucak we, oyapé ujung-ujungngé fungsié ulak we ku aku. Nume tiak atas, tetapi oyale fakta sibenaré. Munisie lahir den benasa ara wan upuhku.
Geralku Anu …!
Ah kasé padih, lagu peri sine, geral gere begitu penting sibetéhi. Kerna sesunguhhé manfaat den fungsi adalah hakiket. Jelassé aku rap urum sahenpé, gere mubetih umur, rawan-banan atau urang-urang den sebagéwé. Rap urum jema banan, jema rawan, kekanak budak bahkan dekat urum jema singe ulak ku Tuhen. Uluni penimul pemikiren. Sumber ni morip. Sumber si gati isesebut wan kiteb suci.
Gere genap tengon oya, jep jenis ni buet hampir béwéné dekat urum aku. Muloi ari petani, jema begulé, sudeger, wartawan, guru, mahasiswa, pejebet, pelisi, senimen atawa céh sawah ku pencopet. Pokok é dekat. Ya nguk iperin ike gere urum aku béwéné buet oya gere penah ara muarti. Bentuk den media kedekatenku nguk berupe sanahpé. Meskipun sidelené ari pakéa gere penah munyadari é.
Enti mulo manusie, benatang den segele makhluk morip lén pé dekat den olok bergantung ku aku. Setidak é ara wan sara siklus, wilayah tanpa batas wilayah. Negara tanpa negara. Sideléné ara simorip wan rembegengku, mugenéng ku kédéngku, silén na mangan, minum justru ari wuk den wih ni éléhku. Bahkan sideléné ara simorip ari uah-uahen den kotoren sikutangkuhen. Wan buet silelagunini aku gere lepas temuni.
Kédéng den kukutku ara siberwarna item, coklat den potih. Lebih semperne ari kelamun. Lebih renggiep ari deléni warna. Betawe wuk kupé, ara siberwarna biru, ijo, koning, item atawe ilang. Oya baro kédéng ilen, rembege den wukku, gere ilen jejari pumu, uku, siku, kerlang, kuduk, rongok, awak, bibir, salak den lén-lén. Tentu delé heme ni Tuhen simubutuhné urum berbagé ni guneé.
Demikien penténgé wan morip ni heme, aku mujadi bene sigere biasa, meskipé sebagien jema néngoné biasa we. Ya, mungkin oya kerna ogohé atawe kerna panéwé. Tetapi seluruh denie muanggap ukuni penting, sunguh penting. Enta Tuhen munos aku kin si pentingngé. Lembaga kul denie faham pedéh kin hal oya, enti mulo negara, organisasi den lembaga-lembaga kucak lénné tentu kelebih penting ilen, tetapi pakéa deba gere faham ilen. Nah oyale aku!
Geralku sibenaré Anu…!
Eee! Sijerohé begini dih, sementarani gere dalih ibetéhi mulo. Apalagi sanake artini sesara geral ike maknaé kite pungkiri. Kerna aku ara cerite tékék den délé kisah. Gere giptu, kebetapé sunguh dekat urum jep makhluk. Gere pentingtu, tapé olok mupengaruh kusegele hal. Pokok é penting le, penting!
Heran sana kati kuperin olok penting? Kerna ike gere ara aku jema bahkan denie mera celaka. Langit urum lapisen ozonné pé ike gere ara aku mera denieni porak olok, bur bersalju i kutub mera tir menta. Pokok é ike gere ara aku seluruh heme si morip i denieni tergangu kesehatenné, temas den keselamatenné.
Wan segele jemen aku dor ipakék den imanfaaten. Mulei ari jemen pudaha sawah ku jemen modrenni hinge akhir jemen kasé. Peran den fungsiku olok igalaki. Segermi, aku sunguh rap urum manusie. Justru kerna oya geralku italu urum, urum Anu…..
Hahaha… gere perlu kujeweb pengunenmu den gere dalih mukekarat, puren kasé betihkowe sahen aku. Gere dalih kuseder geral, nomor telfon atawe buetku, ko pasti betihko kasé sahen aku. Sebeb geral cume geral. Urippen dih mulo isini ulumu den atémua. Kunul gelah tenang den parin benderamu.
Ya, oya kerna akuni terkenal. Lebih terkenal ari tokoh-tokoh pahlawan ataupé para pengkhianat ninegerini sigerallé itolis sejarah mu ulang-ulang, den tentu lebih terkenal mien ari senimen holy ataupé boliwood. Kebetapé ya, ya lagu peri sine. Pakéa gere delé simubetihhi aku kerna sombongngé, kerna laléwé mugalaki sesara bene si juge sesuk i tasku.
Eem! Hanya seje geralku mera mubeda i jep negara, daerah den tempat. Ya, oya lebih isebebpen kerna bahasa si pergunen juge mubeda-beda. Ya oyalé aku. Ya akuni…!
Bentuk asliku memang gere mampat den jerohtu, bahkan mejen mera nos kite terih. Kebetapé arawe sudere den sehebetku si lebih mumentingen belangié. Lagu mampatni tis sé, awak, wuk, rembege juge bau sitangkohné. Sebagien ara si sengeje ibentuk, ibedaki den sebagéwé. Tetapi umummé si lelagu noya adalah bagien terkucak ari hal kul den penting si ara wan tubuhku.
Sebagien lén ara si sengeje irawat, i peralai, i daten, i lindungi atau malah i budidayanen sebagé keindahen, keasrien, teneni kekayaen den sepuh. Kebetapé si lelagu noya biasaé gere mokot, kerna nesu nipakea gere terterka. Seger munolik mera musepuluhen munipak. Becerak “kite lestarin”, e mari oya malah museribun mempunahné.
Nah oyale aku!
Gere dalih penasaren sahen keta aku. Kerna aku memang dekat olok urum sahenpé. Aku, aku ni? Nguk munangkuhen keturunen si delé berupe barang olahen sebagé bahan baku dasar kin segele kebutuhni heme, urum segele bentuk den modellé.
Nge genap, nge genap. Gere dalih iterusko terka-terkamua, den gere perlu sok betih ike buet munenerkawe. Sebeb akupé nge mokot kiset urum terka-terka, isebebpen segele rahasie nge ara wan utokkuni. Teridah pedéh. Bagi simubetih. Nyata olok.
Nume, geralku nume oya. Ikepé betul, oya adalah bagien lén ari geralku. Atau sebut seje oya keral kucak den geral akrapku. Geral lénné nguk sanahpé, sanahenpé si ara i sekeliling ni manusie. Kerna sebenaré i aku ara ilen jutaen geral berdasar bahasa, bentuk, spesies den tempat morippé.
Ko ara mugeral? Alamat den jema tue ke? Ko memang makhluk si beruntung. Lebih beruntung ari makhluk-makhluk lénné i wan donyani. Kerna selohpé ko nguk ulak ku umah den mudemui jema si kasihiko. Tetapi aku, ike nge beluh gere pas ulakné mudemui jema-jema si kusayangi. Seger mupisah, maka selamaé gere ara kesempaten ulak mien lagu simulo.
Ah ngemi oya…
Geralku Anu…!
Alamat …?
Sebenaré tonku dor muke kin sahenpé den selohenpé. Ike ara kekire singah, ku aloi urum galak naté. Kami akan munyamutté urum renah den senang naté. Kaumku memang itakdiren kati dor bersikep ramah kusahenpé si mera singah. Meski salak ni kami mejen i reroroh, icéngi den ioncosi kam. Kerna demikien pemurahé hingge isi-isi ni tuke ni kamipé ikhlas kami osan.
Serloni, engonmi sebagien ari diringkuni! Sana nge sibuetkan ku kami ?
Kam olok bues. Kam memang gere mubetih berijin!
Sikep den sipet kemurahen den keramahen keturunen kami si ingkari kam terkadang turah berimbes gere jeroh ku diri nikam. Kepedihen den kematien, wih ni mata, pongot mutetinyen kuatas kami. Peloah kenakké urum buet silalegunini, tapé kam sabé munulangi buet salah oya mien.
Geralku Anu…!
Ah, bagiku geral gere ilen pentingtu.
Tabi!
Aku tergantung ku kam! Kampé bergantung ku aku !
* i terjemahen ari judul aslié si berbahasa Indonesia “Namaku Anu..!” singe terbit i media cetak den media online.
