[Saer Gayo] Singkih : Kin Engingku Ucak (In Memoriam: Agus Kasim)

oleh

[Saer Gayo] Singkih
: Kin Engingku Ucak

(In Memoriam: Agus Kasim)

Oleh ; Win Gemade

Nge sawah langkah cak
asa kenakne penemahen musimen
Seba ijujung seba iemen
Gegehni rembege munaso liwen
Jarak si gere teseta cak
Alak si gere tesuket
Hejet jeroh bang we si berperala
Gere sege mununung dene

Nge rempak cak
tikon itarah gere berelah
Asa kenakne enti museltu i dene
Lapang muemun
kuyu beremus tik turun
Tangkong ngeleh iralani areh-areh
Mucayami ko dene
Musinermi ko ate

Kudah gere tumung cak
Mampatni sige lagu naruni pumu
Si gere tejangko kin sinerni langit
Si gere terawin gere turah ijelgit
Ara si lungi ara we si pit
Si ruluh gere tetengkupi
Mepat siamat rempakni jejari

Ara we melas cak
uten mukayu Belang mutamas
jerelekni emas Gere tekemas
kiding pantas rui ilewas
Besino beberasen
cerbengni gule tampang ijojoten

Ara we mulintes uwes
Kul nate si gere lunes
Pebengel gere berules
Angan kasat si gere tenes
Gere lebes mununung ilamat

Turah asa ipongoti cak
Beluh si gere berulak
Irai gere temai
italui nge osop peri
Lemutni basa nge taring rasa
Tutur simuatur ikalei kemereng
Bier mulening tetap tenenge
Si mepat ate murasa
Si mehat luh mumata
Lapangmi ko dene
Redukmi ko ate

Takengen, 2020

[SY]


Ikuti channel kami, jangan lupa subscribe :

Comments

comments